"КЕЛАЖАК ОВОЗИ - 2011" ТАНЛОВИ ВИЛОЯТ БОСҚИЧИ
Андижон давлат университетида "Ўзбекистон маданияти ва санъати форуми" жамғармаси, "Келажак овози" ёшлар ташаббуслари маркази, шунингдек, "Камолот" ёшлар ижтимоий ҳаракати ҳамкорлигида ўтказиб келинаётган "Келажак овози-2011" танловининг вилоят бос-қичи бўлиб ўтди.
Ёшларнинг ташаббусларини қўллаб-қувватлаш, янги-янги истеъдодларни кашф этиш, уларнинг иқтидорларини юзага чиқариш ва рағбатлантириш мақсадида анъанавий тарзда ўтказиб келинаётган "Келажак овози" кўрик-танловининг туман ва шаҳар босқичларида жорий йилда 9218 нафар йигит-қизлар иштирок этди.
Танловда туман ва шаҳар босқичларида ғолиб бўлган 708 нафар йигит-қизлар кўргазмали ва саҳна чиқишлари, тақдимотлар кўринишида ўзларининг билим ва маҳоратларини намойиш этдилар. Қизиқарли ғоялар, таклиф ва истеъдодларнинг қизғин баҳсига айланган, кўтаринки руҳда ўтган танлов натижаларига кўра 4 номинация 15 та йўналиш бўйича 39 нафар йигит-қиз вилоят босқичи ғолиблигини қўлга киритдилар.
Танлов якунида барча йўналишлар бўйича ғолиблар диплом ва эсдалик совғалари билан тақдирландилар.
У. АБДУСАЛОМОВ.
|