ФАХРИЙ ОНАХОНЛАР БИЛАН УЧРАШУВ

Яқинда Булоқбоши маҳалла фуқаролар йиғинида Мустақиллигимизнинг 20 йиллигига бағишлаб "Мустақиллик берган бахт" мавзусида фахрийларнинг ёшлар билан учрашуви ўтказилди.

"Нуроний" жамғармаси туман бўлими раиси Исмоилжон Норматов байрамга тайёргарлик борасида олиб борилаётган ишлар, "Буюк ва муқаддассан, мустақил Ватан" шиори остида ўтказилаётган тадбирларнинг аҳамияти ҳақида сўзлади. Учрашувда ёши улуғ онахонлар Ойимчахон опа Ғайназарова, Шакархон опа Маматова, Санталатхон буви Йўлдошева, Майрамхон опа Ғайназарова ва Рисолатхон опа Асрановалар сўзга чиқишиб, Истиқлол берган улуғ неъматлар, юртбошимиз томонидан ёшларга яратилаётган шароитлар, фахрийларга кўрсатилаётган ғамхўрликлар ҳақида фикр билдирдилар.

Учрашувда фахрий онахонлар томонидан ашулалар, халқ қўшиқлари, алла ва "ёр-ёр"лар янграб, жозибали рақслар даврага файз киритди.

Раънохон ЖУМАНИЁЗОВА.