ҲУНАР-ҲУНАРДАН УНАР

ҲУНАРЛИ КИШИ ХОР БЎЛМАС

Кейинги йилларда юртимизда миллий ҳунармандчиликни ривожлантиришга алоҳида эътибор қаратилаётгани ҳам бежиз эмас. Бу борада қатор қонун ҳужжатлари қабул қилингани, ҳунармандлар фаолияти ҳар томонлама қўллаб-қувватланаётгани миллий ҳунармандчилигимиз ривожига хизмат қилмоқда.

Туманимизда ҳам бугунги кунда бир қатор ҳунармандчилик турлари ривожланиб бормоқда. 2010 йилда ташкил этилган "Ҳунарманд" уюшмаси туман бўлими улар фаолиятини ҳар жиҳатдан ривожлантиришга бошчилик қилмоқда. Айни кунда уюшмага 88 нафар уста ҳунарманд жалб этилган. Улар томонидан, айниқса, дурадгорчилик, тикувчилик, каштачилик ва ёғоч ўймакорлиги ривожланиб бормоқда. Бундан икки йил муқаддам юқоридаги миллий ҳунармандчилик турлари билан саноқли ҳунармандлар шуғулланиб келган бўлса, бугунги кунда уларнинг сафи тобора кенгайиб бормоқда.

Шу ўринда хартумлик Наргизахон Ғойипованинг тикувчилик билан шуғулланиб, қишлоқ ёшларига ўз ҳунарини ўргатиб келаётганлигини алоҳида айтиб ўтмоқ лозим. Бу каби ўз ишининг усталари туманимизда кўплаб топилади. "Ҳунарманд" уюшмаси туман бўлими улар фаолиятини қўллаб-қувватлаш билан чегараланиб қолмай, ёшларни миллий ҳунармандчиликка янада кенгроқ жалб этиш чораларини кўрмоқда. Айни шу мақсадда уюшма қошида жорий йил бошида миллий либослар тикишни ўргатиш мақсадида уста-шогирд мактаби ташкил этилди.

- Уюшмамиз тумандаги ҳунарманд усталар билан ҳамкорликни йўлга қўйиб, биргаликда самарали иш олиб боряпмиз,- дейди "Ҳунарманд" уюшмаси туман бўлими раҳбари Наргизахон Мирзаолимова. - Албатта, давлатимиз томонидан фаолиятимизни қўллаб-қувватланаётгани зиммамизга катта масъулият юклайди. Шундан келиб чиқиб, жойларда кенг қамровли тарғибот ишларини олиб бориш билан бирга турли ўқув курслари ташкил этмоқдамиз. Яқинда ўзбекис-тон минтақавий ННТлари ижтимоий аҳамиятли лойиҳаларини қўллаб-қувватлаш грант дастури доирасида биз 2 млн. 800 минг сўмлик грант соҳиби бўлдик. Бу маблағ ҳисобига ишсиз хотин-қизларимиз миллий ҳунармандчилик бўйича ўқитилади. Ўқув машғулотлари якунлангач, ҳунар эгаси бўлган хотин-қизларни иш билан таъминлашга кўмаклашилади.

Бугун ишсизликдан ёки бирон бир касб-ҳунар эгаси бўлмаганликдан нолишга ўрин йўқ. Кимки ҳаракат қилса, имконият топилади. Буни бугун ўз меҳнатлари билан кўпчиликнинг ҳавасини келтираётган, шахсий даромадини кўпайтириб бораётган ҳунармандларимиз мисолида яққол кўриш мумкин.

Акбаржон НАЗАРОВ, Андижон тумани.