МУҚАДДАС ВАТАН

Буюк ва муқаддас Ўзбекистонда

Хумо қушнинг баланд учмоғи азиз,

Мозий қатларидан асрий орзулар

Юксалиб, самони қучмоғи азиз.

Ватан дея урган ҳар бир юракнинг

Оҳидан яралган титроғи азиз,

Шонли Мустақиллик солномасида

Қатор йиллар тизган саноғи азиз.

Ватаннинг дардию, чеккан заҳмати,

Бағрида ҳар сиқим тупроғи азиз,

Азиз, барчасидан оби раҳмати,

Истиқлоли азиз, байроғи азиз.

Ҳурлик карвонида одимлар шаҳдам,

Танлаган нурафшон ўз роҳи азиз,

Азиз, муқаддасдир, чин ишонч билан

Сизу бизга тиккан нигоҳи азиз!

ХУРШИДА БОНУ.