ЁШЛАР БИЛИМЛАРИНИ СИНОВДАН ЎТКАЗДИЛАР
Кеча 33 мингдан зиёд андижонлик ёшлар олий ўқув юртларига кириш учун тест синовидан ўтдилар.
Андижон вилоятида олий ўқув юртларига қабулни ташкил этиш, тест синовларини юқори савияда ўтказиш борасида кенг кўламли ишлар олиб борилди. Хусусан, Ўзбекистон Республикаси Президентининги 2012 йил 7 майдаги "2012-2013 ўқув йилида Ўзбекистон Республикасининг олий таълим муассасаларига қабул тўғрисида"ги қарори асосида муайян ишлар амалга оширилди.
Жорий йилда вилоятдаги 4 та олий ўқув юртига 47 та йўналиш бўйича 3350 та қабул квотаси белгиланган. Жумладан, Андижон давлат университетига - 1440 та, Андижон давлат тиббиёт институтига - 375 та, Андижон машинасозлик институтига - 695 та, Андижон қишлоқ хўжалик институтига - 840 та ўрин ажратилган. Ана шу ўринлар учун олий ўқув юртларида белгиланган тартиблар асосида 33498 нафар абитуриентдан ҳужжатлар қабул қилинди.
Бундан ташқари, қабул жараёнида ҳар бир абитурентга етарли даражада шарт-шароитлар яратиб берилди, тест синовларини ўтказиш бўйича ташкилий ишлар тўлақонли бажарилди, синовлар ўтказиладиган 21 та муассаса, 28 та бинодаги 975 та аудитория зарур жиҳозлар билан таъминланди.
Тест синовларининг холис ва адолатли ўтишини таъминлаш мақсадида маҳаллий ҳокимлик вакиллари, шунингдек, вилоятдаги умумтаълим мактабларининг раҳбарлари тест маркази вакили, бир гуруҳ юқори малакали педагоглар аудитория раҳбарлари, касб-ҳунар коллежлари ўқутувчилари аудитория кузатувчиси, олий таълим муассасаларининг ўқитувчилари назоратчи сифатида иштирок этдилар.
Бир сўз билан айтганда, вилоятда тест синовлари юқори савияда бўлиб ўтди. Синовларда қатнашган ёшларимизнинг талаба бўлишлари учун омад тилаб қоламиз.
У. АБДУСАЛОМОВ.
|