САЛОМАТЛИК МАВЗУСИДА СЕМИНАР ЎТКАЗИЛДИ
Андижон тумани хотин-қизлар қўмитаси ташаббуси билан туман марказий поликлиникасида "Ирсий касалликларнинг олдини олиш, ҳарбий хизматга чақирилувчи ёшларга кўрсатилаётган тиббий муолажаларни такомиллаштириш, ёшларда соғлом турмуш тарзи кўникмаларини шакллантириш чора-тадбирларини амалга ошириш" мавзусида семинар бўлиб ўтди.
Тумандаги қишлоқ фуқаролар йиғинлари раислари, котиблари, маслаҳатчилар, маҳалла фаоллари, тиббиёт бирлашмаси мутахассислари иштирок этган мазкур семинарда ногирон болалар туғилишининг олдини олиш, хизматга чақирилаётган ёшларни соғломлаштириш масалалари, бу борада туманда олиб борилаётган ишлар атрофлича муҳокама этилди.
Тадбирда Андижон тумани хоким ўринбосари, туман хотин-қизлар қўмитаси раиси Н. Зокирова, кўп тармоқли марказий поликлиника мудири М. Адҳамжоновалар аҳоли саломатлигини мустаҳкамлаш ва соғлиқни сақлаш тизимида олиб борилаётган ишлар хусусида маъруза қилдилар. Қизғин савол-жавоблар тарзида ўтган ушбу семинар иштирокчиларнинг билим, малака ва тажрибаларини юксалтиришга, олиб борилаётган ишлар самарадорлигини оширишга хизмат қилади.
М. ХОЛБЕКОВА.
|