ШОДИЁНА

ИСТИҚЛОЛ БАЙРАМИ ШОДИЁНАЛАРИ

ҲАР БИР ҚАЛБГА ҚУВОНЧ УЛАШДИ

Ўзбекистон Республикаси мустақиллигининг 24 йиллиги муносабати билан "Бетакроримсан, ягонасан, она Ватаним - Ўзбекистоним!" шиори остида Истиқлол байрами тантанаси вилоятимизда юксак кўтаринкилик билан ўтди.

Алишер Навоий номидаги маданият ва истироҳат боғи амфитеатрида бўлиб ўтган "Кексалари эъзозда, ёшлари мағрур, бетакрор Ватаним - Ўзбекистоним!" деб номланган тантанада шаҳар ва туманлардан ташриф буюрган меҳнат фахрийлари, хотин-қизлар вакиллари, меҳнат жамоалари илғорлари, шунингдек, бир гуруҳ илғор ва фаол ёшлар иштирок этдилар.

Тадбир очилишида вилоят ҳокими, Сенат аъзоси Шуҳратбек Абдураҳмонов сўзга чиқиб, тантана қатнашчиларини ҳамда вилоятимиз аҳолисини мустақиллигимизнинг 24 йиллиги байрами билан муборакбод этди. Истиқлол йилларида юртимизда, хусусан, вилоятимсизда амалга оширилган улкан бунёдкорлик, шунингдек, халқимиз турмуш фаровонлигини ошириш борасида олиб борилаётган кенг кўламли ишлар хусусида гапирди.

Шундан сўнг намойиш этилган байрам дастурида бадиий жамоалар, таниқли санъаткорлар ҳамда ёш қўшиқчилар ижросидаги куй ва қўшиқлар барчага хушнудлик ва байрамона кайфият улашди.

Шу кунларда вилоятимиз шаҳар ва туманларида, меҳнат жамоалари, маҳаллаларда, ҳар бир хонадонда давом этаётган тантаналар, байрам шукуҳи юртдошларимиз, айниқса, ёшлар қалбида фахр-ифтихор, она Ватанга муҳаббат туйғуларини мустаҳкамламоқда.

Хосият СИДДИҚОВА.