ЭҲТИРОМ
ҚАРИСИ БОР УЙНИНГ ПАРИСИ БОР
Кексалар уйнинг файзи, хонадонларимиз кўркидир. Улар бор уйда барака бор.
Уларнинг ҳамиша оила бошида туришлари, бизларни ҳар ишда қўллаб-қувватлаб, дуога қўл очишларининг ўзи катта бир давлатдир.
Оилаларимизнинг тинч-тотув бўлишида, оила аъзоларининг аҳил-иноқлик ила ҳаёт кечиришларида бобо ва момоларимизнинг ўрни ниҳоятда катта. Уларнинг борлигидан кўнглимиз тоғдай кўтарилади. Кексаларимизнинг айтган ҳар бир сўзи, панд-насиҳатлари аслида ҳаётий ҳақиқатлар, айтганлари эса катта ҳаётий тажрибанинг маҳсулидир. Улардан ибрат олмоқ бугун биз - ёшларнинг бурчидир.
Юртимизга муносиб, баркамол ва етук бўлиб камол топишимиз эртанги кунимизга қўйилган пойдевор эканлиги тенгдошларимнинг қалбига нур бўлиб инмоғи керак. Айни кунда юрт ишқи билан ёниб яшаётган, кўнглига улкан умидларини туккан, эзгу мақсадлар йўлида ўқиб-ўрганаётган ҳар бир ўғил-қиз авлодларимиз, ота-боболаримиз босиб ўтган шарафли йўллардан ибрат олиши лозим. Бугун хонадонларимиз тўрида савлат тўкиб ўтирган, тилларида шукроналик, тиллари, диллари дуода бўлган пиру бадавлат отахон ва онахонларимизни ҳар қанча эъзозласак арзийди.
Наргиза
МУҲАММАДСОДИҚОВА, Марҳамат тумани.
|