ОЛИМА АЁЛЛАР ФАОЛЛИГИ ОРТМОҚДА
Андижон машинасозлик институтида "Ёшларни миллий қадриятлар, кекса авлодга ҳурмат ва эҳтиром руҳида тарбиялашнинг муҳим жиҳатлари" мавзусида конференция бўлиб ўтди.
Вилоят хотин-қизлар қўмитаси ҳамда вилоят "Олима" уюшмаси ҳамкорлигида ташкил этилган мазкур анжуманда вилоятдаги ўрта-махсус ва олий таълим муассасаларида фаолият олиб бораётган олима аёллар, тадқиқотчилар, магистрлар ва иқтидорли талабалар иштирок этиб, мавзу доирасида олиб борилаётган ишлар, олималарнинг ёш авлод тарбияси борасидаги муҳим вазифалари хусусида атрофлича сўз юритдилар.
Тадбирда сўз олган Андижон машинасозлик институти ректори А. Тешабоев, "Олима" уюшмаси раиси, педагогика фанлари доктори Шоҳидахон Юсупова юртимизда илм-фан вакилларига кўрсатилаётган эътибор, яратиб берилаётган кенг имкониятлар ҳақида гапирдилар.
- Мамлакатимизда истиқлол йилларида хотин-қизларнинг илм-фан билан шуғулланишлари, илмий тадқиқотлар олиб боришлари учун зарур барча шароитлар яратиб берилди, - дейди вилоят "Олима" уюшмаси раиси, педагогика фанлари доктори Шоҳидахон Юсупова. - Бунинг самараси ўлароқ, олималар сафи, уларнинг фаоллиги йилдан-йилга ортиб бормоқда. Жумладан, вилоятимиздаги таълим муассасаларида айни кунда 12 нафар фан доктори, 143 нафар фан номзоди бўлган опа-сингилларимиз самарали фаолият олиб бормоқда.
Анжуманда вилоят "Олима" уюшмасининг фаолияти, турли йўналишларда олималар томонидан олиб борилаётган ишлар муҳокама этилди. Шунингдек, ёшларга пухта билим бериш, уларни истиқлол ғояларига, миллий қадриятлар, халқимизнинг тарихий анаъана ва урф-одатларига ҳурмат руҳида тарбиялаш, ҳар жиҳатдан етук ва баркамол инсонлар бўлиб вояга етишларини таъминлаш, маънавий-маърифий ишлар самарадорлигини ошириш бўйича олималар олдидаги муҳим вазифалар юзасидан таклиф, фикр ва мулоҳазалар билдирилди.
Якунда бир гуруҳ олималарга, меҳнат фахрийларига ташкилотчиларнинг фахрий ёрлиғ ва эсдалик совғалари топширилди.
Анжуманда вилоят ҳокимининг ўринбосари, вилоят хотин-қизлар қўмитаси раиси М. Юнусова иштирок этди.
Зилола РАҲМОНОВА.
|