ШУКРОНА
КЎНГИЛ ХОТИРЖАМЛИГИ - ЮРТ ТИНЧЛИГИ ВА ОБОДЛИГИДАН,
- дейди Андижон шаҳридаги "Озодлик" маҳалласида яшовчи меҳнат фахрийси Ҳафизахон Дшанбоева.
Онахон билан суҳбатлашар эканмиз, у ўзининг дил сўзларини муштарийларимизга етказишни сўради. Менинг айтганларим юртимиздаги ҳар бир кексанинг дилидаги гап, дейди онахон. Дарҳақиқат, шундай. Келинг, онахоннинг дил сўзларига қулоқ тутайлик.
- Аллоҳга беадад шукрлар бўлсин, ҳар куни эрта тонгда хотиржам уйқудан турамиз. Оиламиз тинч, хонадонимизда халоват бор. Ҳайрли ишларимиз, эзгу ниятларимиз ижоботини сўраб Яратганга дуолар қиламиз.
Очиғини айтсак, юртимиздаги мана шу тинчлик, ободлик халқимизга берилган улуғ ва бебаҳо неъматдир. Буни кўп ҳаёт қийинчиликларини бошидан ўтказган, машаққатли ва қаро кунларга гувоҳ бўлган биз - кекса авлод вакиллари яхши биламиз. Бугунгидай тинч ва фаровон кунларга етганлар бор, етмаганлар қанча?
Болалигимизда қорнимиз нонга тўймасдан эртадан кечгача меҳнат қилган пайтларимиз кўп бўлган. Энди-чи, мустақиллик шарофати билан ҳамма нарса бисёр, меҳнат қилган кам бўлмайди, ишнинг кўзини билган тадбиркор эса бой-бадавлат яшаяпти.
Андижонимизнинг кундан кунга обод бўлаётганини кўриб, ғурурланаман. Шундай кунларга етганимга шукроналар келтираман. Айниқса, юртимизда биз - кексаларга кўрсатилаётган эътибор ва ғамхўрликдан кўнглим тоғдай кўтарилади. Маҳалладошлар ардоғи, давраларнинг тўри бизники.
Андижондан ўзга бирор жойни кўрмаган оддий бир аёл бўлсам-да, мустақиллик туфайли хаж зиёратини адо этдим. Зиёрат сабаб умримда илк бор самалётга чиқдим. Мана шундай имкониятлар берган истиқлолга шукроналик келтирмаслик мумкинми?
Аёл бахти - оилада, фарзандлар камолида. Шукрки, турмуш ўртоғим Шавкатбек ака билан 6 нафар фарзанд - 2 ўғил, 4 қизни тарбиялаб, элга қўшдик. Бугун фарзандларим, набираларим бахтини кўриб, яйраб кетаман.
Илоҳим юртимиз ҳамиша тинч, ҳаётимиз янада файзли бўлсин. Шундай тўкинликка, ободликка йўл очган юртимиз катталари омон бўлсин.
Нигора ЎРМОНЖОНОВА
ёзиб олди.
|