Сен Момо Ҳавонинг айнан ўзисан

Сен само ойининг тўлин юзисан,

Сен Момо Ҳавонинг айнан ўзисан.

Фаранг ҳурлиқоси ҳасад куйдирган,

Ҳаммадан чиройли ўзбек қизисан.

Олдингда Юноннинг қизлари ҳайрон,

Ҳинд гўзалин сирли кўзлари ҳайрон,

Ойдан ҳусн талашган юзлари ҳайрон,

Ҳаммадан чиройли ўзбек қизисан.

Қуёш ҳам чеҳрангдан гулгун ранг олмиш,

Томошада ой ҳам ҳанг-у манг қолмиш,

Оҳу кўз арабий -- Лайли танг қолмиш,

Ҳаммадан чиройли ўзбек қизисан.

Кўз ёшингни тўкма, нега хомушсан?

Кимларни ўзингдан гўзал демишсан?

Зуҳросан, Раъносан ёки Кумушсан,

Ҳаммадан чиройли ўзбек қизисан.

Акбархон СУЯРХОНОВ.