Олтин куз ранг сочди яна боғларга

Олтин куз ранг сочди яна боғларга,

Бу таниш хотира, таниш манзара.

Япроқлар рақсини бошлади такрор,

Қуёш ҳам маъюсдир, нур сочар хира.

Бу гўзал табиат ўхшайди шу дам,

Уйқу элтаётган мудроқ инсонга.

Ҳосилдан бўшаган яйдоқ далалар,

Ором пардасини тортмоқда юзга.

Меҳнаткаш чумоли шошар инига,

Серғайрат жон энди олади тиним.

Қишлик ғалласини ғамлаб уйига,

Мезон ёмғирини кузатади жим.

Шохда қолган сўнгги барг билан бирга,

Ҳар томон эсади ўйноқи еллар.

Паришон боқаман дала-ю қирга,

Ҳорғин, хира тортиб кўринар йўллар.

Иқболхон МАРИБЖОНОВА.