Янгиликлар
    Сиёсат ва хаёт
    Аёл ва жамият
    Кадриятларимиз
    Хар тугрида
    Бекалик сирлари
    Адабиёт
    Хидоят нури

 ҚИДИРИШ

 ОВОЗ БЕРИШ
Газетамизнинг янги сони сизга манзурми?
 Ха
 Йук
 Менга фарки йук
Овоз бериш натижалари

 РЕКЛАМА


 ҲАМКОРЛАРИМИЗ


Ўзб ¤ Рус ¤ Eng  
№21 дан: 19.05.2016

Жиноят ва жазо

ДИННИ НИҚОБ ҚИЛГАН ДИНИЙ АҚИДАПАРАСТЛАР МАЛАЙИ

Бугун турли диний ақидапарастлик, ёт оқимлар таъсирига тушиб қолаётган айрим кишилар, уларнинг ачинарли тақдирлари ҳақида кўп эшитамиз.

Бундай нохуш қисмат эгалари, жиноят кўчасига кириб қолганларнинг орасида қиз-аёлларнинг борлиги эса аянчли, албатта. Аслида аёл энг чиройли таърифларга, мақтовларга лойиқ бўлиши керак эмасми?! Бироқ айрим опа-сингилларининг ана шу таърифларга доғ тушираётганликларида афсусдамиз.

Марҳамат тумани, Полвонтош шаҳарчасида яшовчи Иқболой ҳам яхшигина оилада туғилиб, вояга етди. Дин илмини ўрганишга қизиқиши бўлгани боис ўзи сўраб-суриштириб, Асака туманида яшовчи Мавлудахон исмли аёлдан яширинча дарс ола бошлади. Сабоқларга ўз вақтида келиб, қунт билан илм ўрганган Иқболой кўп ўтмай устозининг ишончини қозонади. Устози шогирдини яширин тарзда фаолият олиб бораётган Оқилахон деган аёл ҳужрасига юборади. Бироқ Иқболой бу ерда ўзи истагандек илм ололмаётганини, ҳужрадагилар билан тил топиша олмаганини рўкач қилиб, янги устознинг ёнига киради. "Бу ердагиларнинг имони заифлиги" ҳақидаги иддаони эшитган Оқилахон уни ҳужрадан чиқариб юборади.

Ёшгина аёлнинг атрофидагиларни зимдан "нималаргадир" даъват қилиши кейинроқ қўни-қўшни, маҳалла-кўйни ҳам ҳушёрликка чорлади. Иқболойнинг мақсади аслида диний илм олиш эмасдай туюлади. Унинг турли диний жамоатларга қўшилиш, ғаразли оқимлар сафини кенгайтириш, жиҳод қилиш ҳақидаги даъватлари атрофидагиларни сергаклантиради. Ўзига ўхшаган ақидапарастлик ғояларига эргашган аёлларни топишда, улар билан тез-тез учрашиб, ўзаро "фикр" алмашиб туришларида илғор бўлган Иқболой поччасидан олган диний экстремистик ғояни тарғиб этувчи китобда кўрсатилган йўлни тўғри деб билади, шунингдек, уни тарқатиш мақсадида уйида сақлаб келади. Аслида дин мутахассисларининг хулосасига кўра, ушбу китоб диний ақидапастлик ғоялари билан йўғрилган бўлиб, таъқиқланган адабиёт ҳисобланади.

Динни ниқоб қилиб, қиз-жувонларни диний-экстремистик ғоялар тарафдорлари йиғилишларига чорловчи, ёт оқимларга эргашишни даъват қилувчи аёл аллақачон ҳуқуқ-тартибот идоралари ходимлари назоратида эканини сезмасди. Ҳуқуқ ҳимоячиларининг огоҳлантиришларига қарамай, ноқонуний ҳаракатидан тўхтамаган, кўза кунда эмас, кунида синишига ақли етмаган Иқболой ўзи танлаган йўлда бемалол раҳнамоларидан йўл-йўриқ олишда давом этди. Аммо...

"Жиҳодчилар" диний-экстремистик ташкилотининг ғояларини қўллаб-қувватлаб, яширинча ҳужраларда фуқароларга оқимнинг ғоялари бўйича ташкил қилган дарсларининг бирида далилий ашёлар билан қўлга олинган Иқболойнинг боши ўшандагина тошга тегди гўё. Суд залида уч норасида фарзандининг ҳаққи-ҳурмати учун кечиришларини сўраб, тавба-тазарру қилаётган аёл аслида нафратга лойиқ. Жиноят кўчасига кириб, тинчлигимизга қўл кўтармоқққа шайланиб, мустақиллигимизга, юртимиз осойишталигига рахна солувчи турли диний-экстремистик оқимлар йўлидан бораётганида, уларнинг сафларини кенгайтиришга даъват қилаётганида кўзига кўринмаган дилбандлари бугун ҳукм қаршисида "ҳимоя" воситаси бўлаётганини қандай изоҳлаш мумкин?!

Аслида тарбияда оқсоқ бўлган бу аёл эртага юртимиз келажагини яратувчилари дейилаётган ёш авлоднинг уч нафарини тарбиялашда хатоликка йўл қўймайди, деб ким кафолат беради?! Иқболойнинг қилмишларини юртга тош отиш деб баҳоласак тўғрироқ бўларди. Ўзини улғайтирган, тарбиялаган, ўқиб-ўрганишига имконият яратиб берган она Ватаннинг истиқлоли, ривожи, юртдошларининг осойишталигига рахна солувчи, тинчлигини бузувчи ёт, бузғунчи ғоялар билан тўлиб-тошган адабиётлардан "паноҳ" истаган аёл бугун адолат қаршисида пушаймонлигини айтиб, юм-юм йиғламоқда. Бироқ Иқболой сутдан оғзи куйган қатиқни ҳам пуфлаб ичишини - шу сабабдан халқи, юрти, маҳалладошлари барибир унга чин дилдан ишонч билан қарамасликларини билармикан?!

Иқболой қилмишига яраша жазо олди. Одил суд томонидан Ўзбекистон Республикаси Жиноят Кодексининг 244-моддасига биноан айбдор деб топилиб, унга 6 йил қамоқ жазоси тайинланди.

Ватан тинчлиги ҳар недан азиз. Халқ фаровонлиги муқаддас. Айрим кимсаларнинг ғайирли мақсадлари йўлидаги уринишлари ҳеч қачон ижобат бўлмайди.

Садоқат ОРИФ.


« орқага


 МАЪЛУМОТЛАР
Нашр ҳақида
Мулоқот
Обуна
Архив
Фонд лойиҳаси

 РЕКЛАМА


 ОБ-ҲАВО


 ВАЛЮТА КУРСИ
Подробнее на www.nbu.com -->

 РЕЙТИНГ

Hosting by UZINFOCOM




Copyright © 2006 — 2024 IQBOL
Сайт Ўзбекистон мустақил босма ОАВни ва
ахборот агентликларини қўллаб-қувватлаш
ва ривожлантириш жамоат фонди кўмагида яратилди.
Дизайн ва дастурлаш SAIPRO компанияси томонидан амалга оширилди