"АСАКА - АЗИЗ МАСКАНИМ!"
Юртимизда биз - ёшларга кўрсатилаётган эътибор ва ғамхўрлик туфайли кўплаб тенгдошларим қатори мен ҳам салмоқли ютуқларни қўлга киритдим. Мустақиллигимизнинг 25 йиллиги арафасида "Илк қадам" номли шеърий тўпламим нашр этилди. Шу йил "Жаҳолатга қарши маърифат билан" мавзусида ўтган иншолар танловининг республика босқичида фахрли ўринни эгалладим. "Санъатим саодатим" кўрик-танловининг туман босқичида биринчи ўринни қўлга киритдим. Шунингдек, "Юксак маънавиятли авлод", "Юрт келажаги" кўрик-танловларининг адабиёт йўналишида вилоят босқичи ғолиби бўлдим.
Асака менинг ўсиб, улғайган азиз маконим, киндик қоним тўкилган севимли масканим. Шундай гўзал юртда туғилганимдан фахрланаман. Келажакда олий ўқув юртида таҳсил олиб, филолог мутахассислигини эгаллаш ҳамда ижодкор сифатида гўзал шеърларим билан юртим равнақига муносиб ҳисса қўшишни ўз олдимга мақсад қилиб қўйганман.
Беминнат бир маконим
йўқ сендан ўзга,
Хизматдаман то абад
жон бўлса омон.
Қуллуқ қилай, тупроғингни
суртайин кўзга,
Мангу озод, обод ўлкам
Ўзбекистон!
Шоҳсанам ЭРГАШЕВА,
Асака педагогика коллежи битирувчиси.
|