Фикр

СИЗ ДУНЁДА ЯГОНАСИЗ!

"Биз қариётганимиз учун севишдан тўхтамаймиз, балки бутунлай севишдан тўхтаганимиз учун қариймиз".

Бир китобдан шу сўзларни ўқидиму ўйланиб қолдим. Бизнинг ўзбек аёлларига бундай дейиш ноўрин эмасмикан? Чунки "Севиш" деганда фақатгина ёримизни, фарзандларимизни, гўзалликларни яхши кўришни тушунамиз. Умримизнинг охиригача ана шу муҳаббатнинг тафти билан яшаймиз. Ўзимизни-чи? Ўзимизни қачон севамиз?

Турмуш ўртоғимиз рўзғорга бир нима кўтариб келса хурсанд бўлиб мақтаймиз. Фарзандимиз "аъло"га ўқиса, айтган ишимизни вақтида бажарса, қувониб олқишлаймиз. Лекин ўзимиз қилаётган ишлардан кўнглимиз қачон тўлган? Айтингчи, ўзингизга ҳам тез-тез баҳо қўйиб турасизми?

Баъзан йиқилиб, оёғингиз лат еганида, қўлингизни уриб олганингизда ўша аъзоларни беихтиёр силайсиз, шунда оғриқ бироз пасайгандай туюлади-а? Оёқ-қўлларингизни, юрагингизни оғримаган пайтларида ҳам силаб-сийпалаганмисиз? Ахир неча йиллардан бери улар сизга беминнат хизмат қилиб келмоқда-ку!

"Ҳа, мен ўзимни жуда севаман, кечки пайтлар яхши кўрган овқатларимни ейман, мазза қилиб телесериал кўраман", дерсиз. Аслида уйқу олдидан тўйиб овқат емасангиз, умрни ўғирловчи сериаллар кўриш ўрнига, тоза ҳавода сайр қилиб келсангиз, танангиз сиздан кўпроқ миннатдор бўлади. Соатлаб телевизор қаршисида ўтирасиз. Қонингиз қуюлади. Ҳеч бўлмаса, эрталаб ярим соат вақтингизни танангизнинг яйрашига ёрдам тариқасида гимнастика учун бағишлайсизми? Ўзини севган аёллар шундай қиладилар.

"Ўзини севиш" деганда кўпчилик худбинликни тушунади. Асло бундай эмас. Ўзига эътиборли, соғлиги, гўзаллиги тўғрисида қайғурувчи аёл эри, яқинлари учун ҳам севимлидир. Ўзингизни иложи борича кўпроқ мақтанг. Инсоний қадр-қимматингизнинг рўйхатини тузинг. Бу рўйхатга яхши чиққан ишингизни, мазали овқат тайёрлаганингизни ёки қийин пайтида ўртоғингизни қўллаганингизни киритинг. Уни ҳар куни яхши ишларингиз билан тўлдириб боринг. Танангизни ардоқланг, меҳрибончилик қилинг, у билан гаплашинг ва у сизга, албатта, муносабат билдиради. Кўзгуга боқиб, "Мен жуда гўзалман", деб айтинг. Ахир сиз чиндан ҳам гўзал, сиз дунёда ягонасиз. Ана шундай ишонч билан яшаган одам ҳеч қачон севишдан тўхтамайди.

Зулфия МАНСУРОВА.