Тадбирлар

ҲАМКОРЛИК САМАРАЛАРИ

"Оила" илмий-амалий маркази Андижон вилоят бўлимида "Кичик бизнес ва хусусий тадбиркорликни ривожлантириш истиқболлари" мавзусида икки кунлик семинар бўлиб ўтди.

Ўзбекистон Хотин-қизлар қўмитаси ҳамда Германиянинг Халқаро ҳамкорлик жамғарма кассалари фонди ҳамкорлигида амалга оширилаётган "Ўзбекистонда молия секторини қўллаб-қувватлаш" лойиҳаси доирасида ўтказилган мазкур семинарда вилоят ўрта махсус касб-ҳунар таълими бошқармаси тизимидаги коллеж ва лицей ўқитувчилари иштирок этиб, мавзу доирасида янги билим ва кўникмаларга эга бўлдилар.

Семинарда Германиянинг Халқаро ҳамкорлик жамғарма кассалари вакили Михаил Франц томонидан "Молиявий саводхонлик" мавзусида маҳорат машғулоти ўтказилди. Шунингдек, семинарда очиқ мулоқот тарзида машғулотларда шахс ва мулкдор ўртасидаги муносабатлар, реклама ва тадбиркорликнинг сир-асрорлари тўғрисида иштирокчиларга кенг тушунчалар берилди.

Семинар мазкур йўналишдаги ишлар самарадорлигини ошириш, иштирокчиларнинг мавзу доирасидаги билим ва тушунчаларини янада кенгайтириш имконини берди.

Хосият СИДДИҚОВА.