№17, 28.04.2016 ЭНГ БИЛИМДОН ҲАМШИРА АНИҚЛАНДИ
Андижон шаҳридаги "Баркамол авлод" болалар марказида "Ҳамшира - 2016" кўрик-танловининг вилоят босқичи бўлиб ўтди.
Юртимизда аҳоли саломатлигини муҳофаза қилиш, тиббиёт тизими ривожлантириш, аҳолига кўрсатилаётган тиббий хизмат сифати ва савиясини юксалтириш, соҳада амалга оширилаётган ислоҳотлар самарадорлигини, шифокорларнинг, айниқса, ўрта тиббиёт ходимларининг касбий билим ва малакасини ошириш борасида ибратли ишлар олиб борилмоқда.
Айни кунда вилоятдаги тиббиёт муассасаларида 26 минг нафардан зиёд ҳамшира меҳнат қилмоқда. Уларнинг энг илғор 12 нафар вакиласи иштирок этган танловнинг вилоят босқичи қизиқарли ва юксак савияда ташкил этилди. Қатнашчилар таништирув, тиббиётга оид савол-жавоб, беморлар билан ишлаш амалиёти сингари бешта шарт бўйича ўз билим ва маҳоратларини намойиш этдилар.
Якуний натижаларга кўра, Қўрғонтепа тумани тиббиёт бирлашмаси ҳамшираси Марғубахон Комилова биринчи ўринга сазовор бўлиб, танловнинг республика босқичида қатнашиш ҳуқуқини қўлга киритди. Иккинчи ўрин шошилинч тиббий ёрдам кўрсатиш республика илмий-амалий маркази Андижон филиали ҳамшираси Гулноза Турғуновага, учинчи ўрин Марҳамат туманидаги Ғафур Ғулом қишлоқ врачлик пункти патронаж ҳамшираси Хурсаной Мирзакаримовага насиб этди.
Ғолибалар ва танловнинг барча иштирокчиларига вилоят соғлиқни сақлаш бошқармаси бошлиғи Қ. Ёрқулов диплом ва эсдалик совғалар топширди.
М. ХОЛБЕКОВА.
|