БОЛАЛАР ҲАМИША ЭЪТИБОРДА

Андижон туманидаги фаол ўқувчи ёшлар маркази ҳудудидаги аквапаркнинг мавсумий очилишига бағишланган тадбир бўлиб ўтди.

Вилоят ҳокимлиги, хотин-қизлар қўмитаси, прокуратураси, ички ишлар бошқармаси ҳамда вояга етмаганлар ишлари бўйича комиссия ҳамкорлигида ўтказилган ушбу тадбирда ёш спортчилар, чемпионлар ўзларининг кўргазмали чиқишларини намойиш этдилар.

- Болаларнинг ёзги дам олишларини мароқли ва мазмунли ўтказиш мақсадида ташкил этилган ушбу аквапаркнинг очилиши фарзандларимизга чинакам совға бўлди,- дейди вилоят прокурори катта ёрдамчиси Баҳодир Саидкамолов. - Ўбекистон Республикаси Вазирлар Маҳкамаси ҳузуридаги вояга етмаганлар ишлари бўйича комиссиянинг ташаббуси билан ташкил этилган мазкур чўмилиш мажмуасининг жорий йил мавсумидаги очилиш маросимига меҳрибонлик уйи тарбияланувчилари ҳамда иқтидорли ўқувчилар таклиф қилинди. Ушбу маскан бу йил ҳам Андижон ёшларининг ёз мавсумини мароқли ўтказадиган севимли масканларидан бири бўлиб қолади.

З.РАҲМОНОВА.