АСКАРЛАР БЕЛЛАШУВИ

Андижон туманидаги 16-болалар мусиқа ва санъат мактабида ҳарбий хизматчилар ўртасида "Хазил хизматга ёрдам беради" деб номланган маданий тадбир бўлиб ўтди.

Ҳарбий хизматчилар, уларнинг оила аъзолари иштирокида ўтган ушбу тадбир доирасида ўтказилган беллашувда Андижон туманидаги ҳарбий қисм хизматчиларидан ташкил топган "Бургут" ва "Эксклюзив" жамоалари ҳарбий хизмат соҳасида эгаллаган билим ва кўникмалари, шунингдек, ҳарбий хизматни шараф билан адо этаётган сержант ва офицерлар ҳаёти билан боғлиқ жараёнларни саҳна кўринишлари орқали акс эттириш шартлари бўйича ғолиблик учун баҳс олиб бордилар.

Ҳарбий қисм командирининг шахсий таркиб билан ишлаш бўйича ўринбосари, капитан Б. Абдувалиев раҳбарлигидаги нуфузли ҳакамлар ҳайъати томонидан аскарларнинг чиқишлари баҳолаб борилди.

Якунда "Бургут" жамоаси ғолиб деб топилиб, ҳарбий қисм раҳбариятининг диплом ва эсдалик совғалари билан тақдирланди.

Аскарлар ва болалар мусиқа ва санъат мактаби ўқувчилари томонидан ижро этилган куй ва қўшиқлар барчага хуш кайфият улашди.

Санобар СУЛАЙМОНОВА,

ҳарбий қисм хизматчиси.