№44, 31.10.2013 ҲАШАРЧИЛАР ҲУЗУРИДА
Яқинда Пахтаобод, Олтинкўл, Избоскан ва Андижон туманлари пахта далаларида меҳнат қилаётган ҳашарчилар ҳузурига республикамизнинг етакчи нашрларидан бўлган "Халқ сўзи" ва "Народное слово" газеталари вакиллари ташриф буюриб, теримчилар билан дилдан суҳбат ўтказдилар.
Суҳбатларда юртимизда амалга оширилаётган ислоҳотларни, халқимизнинг бунёдкорлик ишларини ёритиш борасида республикамизнинг бош нашрлари таҳририятлари томонидан олиб борилаётган ишлар, умуман, оммавий ахборот воситаларининг жамиятимиз ижтимоий-сиёсий ҳаётидаги ўрни ва роли хусусида сўз юритилди.
- Мақсадимиз теримда иштирок этаётган юртдошларимизга шижоат, кўтаринки кайфият бахш этиш, - дейди "Халқ сўзи" газетаси бўлим муҳаррири Қобилжон Ҳидиров. - Ўйлайманки, қизиқарли, кўтаринки руҳда ўтган учрашувларимиз иштирокчиларга катта маънавий озуқа бера олди.
Қатнашчиларда катта таассурот қолдирган учрашувлар якунида илғор теримчиларга "Халқ сўзи" ва "Народное слово" газеталари таҳририятларининг эсдалик совғалари топширилди.
Ф. ИБАЙДУЛЛАЕВ.
|