№27, 02.07.2015 Шукроналик
ИСТИҚЛОЛ - ЭНГ УЛУҒ НЕЪМАТ
Ватан - муқаддас, табаррук маскан. Унинг мустақиллиги, тинчлиги эса улуғ неъматдир. Ўзбекистон аталмиш буюк замин бағрида туғилиб, вояга етмоқ, яшамоқнинг ўзи чинакам бахт.
Истиқлол тантана қилиб, озод ва фаровон яшаётганимизга ҳам 24 йил тўлмоқда. Доно юртбошимизнинг оқилона сиёсати туфайли йиллар давомида турли қийинчиликларни енгиб ўтиб, бугунги файзли кунларга етиб келдик. Ободликдан, тўкинликдан кўнгилларда хотиржамлик, эртанги кунга ишонч барқарор. Юртда эркинлик, ободлик, қонун устиворлиги ҳукмрон.
Юртбошимиз раҳбарлигида Ўзбекистон ўзига хос тараққиёт йўлини танлади. Демократик принципларга асосланган фуқаролик жамиятини шакллантириш, жамиятни қонун ва адолат мезонлари ҳамда ҳамма нарса инсон ва унинг манфаатлари учун деган ақида асосида ривожлантириш бош мақсадимизга айланди.
Мамлакатимизда фуқароларнинг ҳақ-ҳуқуқлари, манфаатларини ҳимоя қилишга, ҳуқуқий билим ва саводхонлигини ошириш масаласига алоҳида эътибор қаратилмоқда. Бунинг самараси ўлароқ, юртдошларимиз, айниқса, хотин-қизларимиз жамият ижтимоий-сиёсий ҳаётида фаол иштирок этмоқда.
Бугунги тинч, тўкин ва фаровон ҳаётимиз, инсон омилига кўрсатилаётган эътибор ҳар қандай кишини беҳад қувонтиради. Мана шундай кунларнинг қадрига етиш, асраш ҳар биримизнинг бурчимиз бўлмоғи керак. Зиммамиздаги ана шу бурчни адо этиб, шу юрт равнақига, унинг янада гуллаб-яшнашига қўлимиздан келганча ҳисса қўшайлик.
Роҳатой ҚОДИРОВА,
Андижон шаҳридаги 10- сон давлат нотариал идораси нотариуси.
|