Мулоҳаза

МИЛЛИЙ ЛИБОСИМИЗ - ҲАЁ, ИБОИМИЗ!

Ўзбек миллий матолари, миллий либослари деганда, кўз олдимизда адрас, атлас, беқасам, банорас каби матолардан тикилган либослар гавдаланади. Ҳар бир миллат каби ўзбек миллати ҳам ўзига хос кийиниш маданиятига эга.

Бошқа миллат либослари билан ўзбек миллий либослари таққосланганда, албатта, сўзсиз бизнинг миллий либосларимиз афзалроқ ва жозибалироқ кўринади. Миллий либосларимиз - бизнинг ибою ҳаёимиз, фахримиз. Бу либосларни, масалан, атлас матосини қанчалар жозибали эканлигини чет эллик сайёҳлар ва экспертлар ҳам юқори баҳолашади. Бироқ, узоқ юртлардан томошага келган меҳмонлар ҳам бизнинг миллий либосларимизга қизиқиш билдиришаётган бир пайтда, мана шундай гўзал либосларимизни, урф-одатларимизни унутиб, чет эл маданияти таъсирига берилиб кетаётганлар ҳам йўқ эмас. Ҳозирги кунда урф бўлаётган очиқ-сочиқ либослар айрим қизларимизнинг кундалик кийимларига айланаётганини қандай изоҳлаш мумкин?! Бу, шубҳасиз "оммавий маданият"нинг ёшларимизга кўрсатаётган салбий таъсирларидан биридир. Бугун жаҳонга машхур киноактёрлар, хонандаларнинг "рекламаси" ёрдамида ҳудди улардек бўлишни хоҳловчи қизларнинг сони ортиб бормоқда. Лекин, ўйлаб кўрилса, бу либослар ҳаёли, иболи ўзбек қизларига умуман ярашмайди-ку! Бу нарса бизнинг диний эътиқодларимизда ҳам ижобий ҳолат сифатида баҳоланмайди. Бундан ташқари, ҳориждан кириб келаётган кўпгина кийимлар ўзининг торлиги, тайёрланган матосининг сифати билан аёллар соғлигига салбий таъсир кўрсатиши мумкинлиги мутахассислар томонидан таъкидланган.

Ана энди ҳақли савол туғилади: миллийлигимиздан четга чиқмаган ҳолда, қандай қилиб замонавий қиз бўлишимиз мумкин? Бу каби маънавиятимизга зид маданият таъсирига тушмасликнинг чораси борми? Ҳа, албатта бор! Бу ҳам бўлса тарихдан бизга фахр ва ғурур бўлиб келаётган миллий матоларимиздан замонавий кўринишдаги кийимлар тикиш, десам, ўйлайманки, кўпчилик фикримга қўшилади. Ҳа, айнан шу йўл орқали биз - ўзбек қизлари ўзлигимизни йўқотмасдан, замон билан ҳамнафас қадам ташлаймиз. Асосийси, бу матолардан тикилган либослар хотин-қизлар соғлиғига ҳеч қандай зиён етказмаслиги билан ҳам афзал ҳисобланади.

Ўзимиз учун кийим танлаётганимизда ана шу иккала ҳолатни ўзида муажассам этган либосларга эътибор қаратайлик. Ана шунда биз ҳам улар каби чинакам ўзбекнинг қизи - ўзбекнинг юзи деган номга муносиб бўламиз!

Мукаррамой ХЎЖАБЕКОВА,

АДУ талабаси.