№3, 14.01.2016 Мулоҳаза
ТИНЧЛИКНИНГ ҚАДРИГА ЕТАЙЛИК
Қайси юртда тинчлик ҳукмрон экан, ўша ерда хотиржам яшашга, жамиятнинг тараққий этишига имкон бўлади. Агар аксинча бўлса, бундай юртда фуқаролар эмин-эркин яшай олмайдилар. Ўз орзу ва истаклари сари олға интила олмайдилар.
Бизнинг юртимиз эса тинч, хонадонларимиз файзли, дастурхонимиз тўкин-сочин. Ёшларимиз шижоатли, зукко ва доно, аёлларимиз оқила, кексаларимиз пиру бадавлат ва ҳар бир инсон бир-бирларига меҳр-оқибатлидир. Шундай экан, биз мана шундай юртда яшаётганлигимиз, тинчлигимиз, ҳаётимиз ҳотиржамлигининг қадрига етиб, шукрона билан яшамоғимиз керак.
Биз ёшлар учун яратилаётган барча шарт-шароитлар ҳам тинчлик ва фаровонлик туфайлидир. Биз ана шу имкониятлардан унумли фойдаланган ҳолда, юртимизнинг гуллаб-яшнаши учун ўз ҳиссамизни қўшмоғимиз даркор.
Қолаверса, Ватанимиз тинчлигининг барқарор бўлишида юртимиз посбонлари, ўз бурчларини сидқидилдан адо этаётган ҳарбийларнинг хизматлари ниҳоятда катта. Улар кечани кеча, кундузни кундуз демай, Ватанимиз сарҳадлари даҳлсизлигини сақлаб келмоқдалар. Шу ўринда юртимиздаги тинчликни сақлаш биз - ёшларнинг ҳам муқаддас бурчи эканлигини ҳар биримиз яхши билишимиз керак.
Азиз тенгдошлар! Келинг, қўлни-қўлга бериб, Ватанимиз тинчлиги, обод ва озодлиги, юртимиз равнақи учун билим олишдан, изланишдан тўхтамайлик. Билиб-билмасдан турли иллат ва диний оқимлар таъсирига тушиб қолмайлик. Олдимизга қўйган эзгу мақсадларимиз сари олға интилиб, юртимиз тараққиётига муносиб ҳисса қўшайлик.
Нигора АБДУЛЛАЕВА,
Андижон тиббиёт коллежи ўқувчиси.
|