№22, 26.05.2016 Намунали таълим масканлари
ТЎЙГА ТЎЁНА БИЛАН...
Мамлакатимиз Мустақиллигининг 25 йиллик тўйини мактабимиз жамоаси муносиб тўёналар билан кутиб олмоқда. Хусусан, ўқувчиларимиз Садоқат Солижонова, Хуршида Турғунбоева "Юксак маънавиятли авлод", "Биз - буюк юрт фарзандларимиз" кўрик-танлови ҳамда фестивалининг вилоят, республика босқичларида фаол иштирок этдилар.
Мактабдаги бўш турган хоналардан унумли фойдаланиш мақсадида педагогик жамоамиз ташаббуси билан жорий йилда ипак қурти боқилиб, шу кунларда давлатга 250 килограмм пилла топширилди. Бундан ташқари, 30 сотихдан ортиқ майдонга олма кўчатлари экилиб, боғ барпо этилди. Боғ ораларига эса полиз махсулотлари экилди. Ҳудудимизга ўтказилган 300 тупга яқин гул кўчатлари мактабимизга янада чирой бағишлаш билан бирга барчанинг руҳиятини кўтармоқда.
- Мактабимизда бюджетдан ташқари сармоя топиш мақсадида ички имкониятлардан оқилона фойдаланишга ҳаракат қиляпмиз, - дейди мактаб директори Эркинжон Тоштемиров. - Ҳозирда ана шу маблағлар ҳисобига 106 метр мактаб атрофи бетон девор билан ўралмоқда. Мактабни 2016-2017 ўқув йилига таъмирлаш, куз-қиш мавсумига тайёрлаш билан боғлиқ ишлар ҳам амалга оширилмоқда.
Дарҳақиқат, мактабда олиб борилаётган бу каби ибратли ишлар самараси ўлароқ фидоий ўқитувчи ва иқтидорли ўқувчилар бюджетдан ташқари маблағлар ҳисобидан мунтазам рағбатлантириб келинаётганлиги эътиборга молик.
Мухтасар айтганда, мактабимиз жамоаси юқоридаги каби хайрли ишлари билан мустақиллик байрамини муносиб кутиб олмоқда.
Ҳамрохон МАМАТҚУЛОВА,
Жалақудуқ туманидаги 30- умумтаълим мактаби ўқитувчиси.
|