№23, 02.06.2016 Муносабат
ЭКРАН ОРТИДАГИ ОҒУ
Ҳар куни кундалик юмушлардан чарчаб, ҳордиқ чиқариш учун зангори экран қаршисига ўтирамиз. Турфа дастурлар, кўрсатувлар, кинофильмлар... Улар орасида яхшиси ҳам бор, маънавиятга салбий таъсир қиладигани ҳам йўқ эмас. Ҳатто айрим фильмлар кўришга ҳам арзимайди. Савияси паст, ёшлар тарбиясига зид, миллийликдан кўра оммавий маданият таъсирлари яққол намоён бундай фильмларни қораламасликнинг имкони йўқ.
Айниқса, хориж каналлари орқали берилаётган баъзи очиқ-ойдин, оилавий муаммолар ҳам бемалол муҳокама қилинаётган кўрсатувлар, киноларни умуман ёшлар кўришини тавсия қилмаган бўлардим. Ахир биз ор-номусли, уйдаги гапни кўчага чиқаришга ҳаё қиладиган, андишали миллат вакилларимиз.
Тўғри, аслида ёшларга бу кўрсатувни кўрма, униси ундай, буниси бундай, дея уқдириш осон эмас. Бироқ бугунги айрим ўзбек киноларида ҳам қизларнинг ўта замонавий кийимларда намоён бўлишини қандай оқлаш мумкин? Уларга ўхшаб кийинишга ҳаракат қиладиган қизлар ҳам исталганча топилади.
Тенгдошлар, биз оммавий маданиятга қарши турайлик. Уни ўзида жамлаган турли фильмларни, кўрсатувларни томоша қилишдан қочайлик.
Дилобар МУҲАММАДСОЛИЕВА,
Балиқчи тумани.
|