Косметика ва руҳият

МАКИЯЖ ВА ФЕЪЛ-АТВОР

Аёлларнинг юриш-туриши, гапириши, ҳатто кийиниши, пардоз-андозига қараб, унинг қандай характерга эга эканлиги ҳамда феъл-атворини билиб олиш мумкин.

Психологлар ўтказган қатор тадқиқотлар натижалари асосида тайёрланган қуйидаги тест аёлларнинг пардозига қараб, уларнинг феъл-атвори қандай эканлигини билиб олишга ёрдам беради.

Минимал макияж. Агар сиз қовоққа тень суриш ва лабларни бўяш билан кифоялансангиз, демак, сиз ўзингизга қаттиқ ишонасиз. Фикрингизча, эркак киши сизнинг ташқи кўринишингизни эмас, аксинча, маънавий оламингизни қадрлашини, ҳурмат қилиши керак, деб ҳисоблайсиз. Ўзаро келишувларга мойиллигингиз ҳам бор. Кўпинча ўз кучингизга таяниб иш кўрасиз ва тўғри таҳлил қила оласиз.

Кўзга урғу берилган макияж. Пардоз қила туриб, кўзлар кўриниши ва ифодасига урғу берсангиз, кузатувчанлик бобида кучлисиз. Қайғу ва аламларингизни ичга ютиб, сир бой бермасликка уринасиз. Ичимдагини топ дейдиганлар хилидансиз. Кўпроқ гапиришдан кўра, эшитишни маъқул кўрасиз. Баъзан ёлғиз қолишни истаб турасиз.

Лабларга урғу берилган макияж. Мабодо макияж пайтида кўпроқ лабларга эътибор берсангиз, феъл-атворингизга қуйидагилар хос: доим барча янгиликлардан огоҳ юрасиз. Ҳар қандай қийин вазиятларда ҳам йиғлашни маъқул кўрмайсиз. Сизга кўпроқ эркаклар билан суҳбатлашиш ёқади. Ёлғизликни умуман қабул қилмайсиз. Ҳамманинг диққат-эътибори сиз учун жуда муҳим.

Ёрқин, барчани жалб этадиган макияж. Юзингизга пардоз-андоз қилаётиб, бир неча мартага етадиган бўёқларни бирданига ишлатсангиз, унда сиз: кўп нарса учун қайғурасиз. Юракдаги алам ва қайғуларни бўёқ орқали беркитишга уринасиз. Айни дамда одамларга ишончингиз сусайган. Гарчи бундай бўлмаса-да, эътибордан четда қолмаслик йўлларини кўп излайсиз.

МЕҲРИНИГОР тайёрлади.