У қўшиқ энг буюк бир кундир

Болам, бир қўшиқ бор дунёда, болам,

Илк бора отадай айтайин уни.

У қўшиқ энг буюк бир кундир -

Жаҳон шоирларин туғилган куни.

Болам, бир қўшиқ бор дунёда, болам,

Унинг офтобидан руҳингни бойит.

У қўшиқ энг буюк бир ойдир -

Жаҳон халқларининг туғилган ойи.

Болам, бир қўшиқ бор дунёда, болам,

Унинг куйларидан чиқсин-да тилинг.

У қўшиқ энг буюк бир йилдир -

Жаҳон ватанларин туғилган йили.

Болам, бир қўшиқ бор дунёда, болам,

Ҳаёт кўкраклари туради ийиб.

Болам, у қўшиқни аёллар ҳар кун

Қуёшнинг сутига олади чайиб.

Эшқобил ШУКУР.