Сен Ватаннинг ёруғ юзисан, ўғлим!

Бўй-бастингга боқиб, қувнайди кўзим,

Армонлар йироқлаб кетади дилдан,

Ватан хизматига шайлангин, ўғлим,

Сен менинг нурафшон юзимсан, ўғлим!

Фидойилик йўли бу улуғ йўлдир,

Порлоқ иқболингда орзум мушарраф.

Ҳарбий либослари ярашган ўғлим,

Эл корига яраш - энг олий шараф.

Мардона қадам бос мардлар сафида,

Ишонч-ла кўз тикар сенга, ҳур диёр.

Шу Ватанни рози қилсанг бас, ўғлим,

Халқнинг дуосида улуғ ҳикмат бор.

Ғайрат-шижоатинг, чин муҳаббатинг,

Ҳар босган изингга шамчироқ бўлсин.

Ҳақ ва адолатнинг манзилларида,

Айтар сўзинг кескир, дилинг пок бўлсин.

Ватан ҳимояси - энг муқаддас бурч,

Ичган қасамингга содиқ бўл, ўғлим,

Менинг бор имконим дуоларимдир,

Менинг бор бойлигим ўзингсан, ўғлим.

Сен ватаннинг ёруғ юзисан, ўғлим!

ХУРШИДАБОНУ