ОПА-СИНГИЛЛАРГА МАКТУБ

Салом, опаларим, тинчмисиз синглим,

Тенгдош ўртоқларим, вақтингиз чоғми?

Саломат бўлсангиз бир он ўтириб,

Мактубимни ўқинг, онангиз соғми?

Ҳайрон қолдиргандир бу нозик савол,

Она омон бўлсин ёруғ жаҳонда!

"Раҳмат" деди кимдир шукрлар қилиб,

Кимдир бош чайқади минг бир армонда.

Ўғил-қиз, набира, қуда-анда бор,

Биз ҳам ёш эмасмиз: келин, онамиз.

Яна йўлимизни интизор кутган.

Мунис онамизга ҳамон боламиз.

Кекса оналарнинг ҳаёт, ҳолини,

Меҳр-ла кузатиб, қаламим олдим.

Опа-сингилларга битган мактубим

Оналардай оддий бир шеърга солдим.

Она: юрт сарбонига умрлар тилар,

"Инсоф берсин" дейди ғанимларига.

Деҳқон, боғбонига барака сўраб,

"Раҳмат" дейди ҳофиз, олимларига.

Баъзан ёлғизликда суҳбатдош қўмсаб,

Бир дилдош истайди - ширинсўз, малҳам.

Бир-бир келиб, кўпроқ дардлашиб туринг,

Ишлар, учрашувлар бўлса ҳам бир кам.

Сизга алла айтган жон онангизга,

Ҳадис ўқиб беринг, хушҳол ҳикоят.

Сиздан ором олсин муштипар жони,

Сўзласа жим туринг, сўзлари оят.

Улар энди қари, у кекса-гўдак,

Сесканиб кетмасин овозингиздан.

Шошилмай гапиринг, танлаб сўз айтинг,

Бир куни қайтади фарзандингиздан.

Етмиш-саксон ёшда не савдо бошда?

Тортишманг, баҳслашманг, не деса ҳақлар.

Келинни "қизим" дер, куёвни "ўғил",

Баъзан катта қолиб, кичикни ёқлар.

Қариндош-уруғни бир-бир эслатар,

"У - ота уруғим, у - она қавмим.

Отанг жигарлари келиб турибди,

Доим очиқ бўлсин дарвоза, ҳовлим".

Битганимнинг бори дилингизда бор,

Узр, шу номани тилади кўнглим.

Сиз ҳам энг эъзозли бир она бўлинг,

Қадрлигим опам, дугонам, синглим.

Онага зорларим, сизга не дейин?

Ўзингизни асранг, ожиз бандамиз.

Ҳамиша сабрли, шукрли бўлган,

Аёлмиз азалий имтиҳондамиз,

Онам, опам, сингилжонларим!

Сизга жоним фидо, соғ бўлинг доим!

Фаридахон ТОШХЎЖАЕВА,

Олтинкўл тумани.