№16, 14.04.2016 Янги китоб
ИЖОД СЕҲРИ
Нозима Ўлмасова шеъриятнинг сеҳрли оламига эндигина кириб келаётган ёш ижодкорлардан биридир. Ўз олдига билим олиш, адабиётнинг сир-асрорларини пухта эгаллаш орқали юртдошларимизга ўзининг ижод намуналарини туҳфа этмоқликни мақсад қилиб олган. Ҳозирда у Хўжаобод педагогика ва ижтимоий-иқтисодиёт коллежида таҳсил олиш билан бирга, Ўзбекистон Ёзувчилар уюшмаси вилоят бўлими қошидаги "Бобур издошлари" адабий тўгарагининг фаол аъзоларидан бири сифатида ижод борасидаги билим ва маҳоратини мустаҳкамламоқда. Турли матбуот нашрлари саҳифаларида чоп этилаётган унинг шеър, кичик ҳикоя ва қатралари кўпчиликка манзур бўлмоқда.
Яқинда Тошкентдаги "Мумтоз сўз" нашриётида Нозиманинг "Ишқ илтижолари" деб номланган илк шеърий тўплами нашрдан чиқди. Ушбу китобга киритилган шеърларда адабиётга меҳр, туғилиб ўсган диёрга, ота-онага бўлган самимий муҳаббат, ёр-у дўстларга садоқат туйғулари тараннум этилган.
Тўпламдан ўрин олган "Қалбим покиза", "Ишқим чин", "Мен қайтаман" номли шеърлар гўзал ташбеҳларга бойлиги, самимий мисралари билан ажралиб туради. Айниқса, "Ишқ илтижолари" шеъридаги қуйидаги сатрлар ўқувчини бефарқ қолдирмайди, албатта.
Мен қайтаман соғинганингда,
Кўзинг ёшга тўлганда бир кун.
Мен қайтаман эслаганингда,
Ой ёритса қаро тун бағрин...
Келажакда яхши ижодкор бўлишга интилаётган Нозимахонга оқ йўл, ижодий баркамоллик, ўқиш ва ишларида омадлар тилаб қоламиз.
Хосият СИДДИҚОВА.
|