Янгиликлар
    Сиёсат ва хаёт
    Аёл ва жамият
    Кадриятларимиз
    Хар тугрида
    Бекалик сирлари
    Адабиёт
    Хидоят нури

 ҚИДИРИШ

 ОВОЗ БЕРИШ
Газетамизнинг янги сони сизга манзурми?
 Ха
 Йук
 Менга фарки йук
Овоз бериш натижалари

 РЕКЛАМА


 ҲАМКОРЛАРИМИЗ


Ўзб ¤ Рус ¤ Eng  
Адабиёт

№29, 14.07.2016

ҲАЁТ - ИБРАТ МАКТАБИ

ОТАСИНИ КУТАЁТГАН БОЛАЛАР

Ўттиз беш ёшга чиққан дугонам бор. Оқила қиз. Кўрган кўзнинг суқи киради. Худо ҳусндан, фаҳм-фаросатдан, ақлдан қисмаган. Ҳатто керагидан ортиғи билан сийлаб қўйганки, баъзан шундай ҳурлиқонинг бахти очилмаётганига "балки гўзаллиги, боз устига ақллилиги учун кибрга берилиб, йўлидан чиққанларни рад қилиб, ҳанузгача ёлғиз юрибдими" дея ўйлаб қоламан.

Туғилган кун, байрамлар баҳона йиғилиб қолганимизда ҳаммамиз ўртага олиб гапирамиз. Баъзан таниш-билишлардан сўроқлаб, куёв топамиз. Айримлари билан учрашади, айримлари ҳақида эса эшитган заҳоти оғзимизга уради:

- Мен ажрашган эркакка тегмайман! Битта оилани, бир аёлни эплаб йўлга сололмаган, фарзандларининг қисматини ўйламаган эркак ҳам эркакми?! Онаси ёқмай қолган бўлса, аламини боласидан оладими?! Бундай пасткашларга тенг бўлгунимча тупроққа тенг бўлганим афзал!..

Тўғриси, авваллари унинг бу тарздаги гапларини маъқулламасдим. "Нимадир жон-жонидан ўтгани учундир эркак болаларини ҳам ўйламай ажрашгандир-да" дер эдим. Кейинги пайтларда кўрган-кузатганларим асносида дугонамнинг ҳақ эканига, фарзандига раҳм қилмаган эркакдан инсонийлик чиқмаслигига амин бўлдим.

...- Эрим хорижда ишлайди, - дейди таҳририятга қўнғироқ қилиб, мен билан кўнгил дардларини бўлишишни истаган аёл. - Болаларидан ҳол-аҳвол сўрамайди. Уй-жойимиз йўқ. Ўн икки йилдан бери ижарада яшаймиз. Болаларим улғаймоқда, отаси эса масъулиятни ҳис қилмайди. Ойлаб болалари билан гаплашмайди. Ўзим мажбурлаб "Болаларингиз билан гаплашинг" деб гўшакни болаларга тутқазмагунимча ўзи "Болаларни соғиндим, қани, улар билан гаплашай" демайди. Мен ёмон хотиндирман, кўнглини қолдирадиган гаплар айтгандирман. Лекин бунинг учун болаларида нима айб?..

Маҳзун оҳангда, эзилиб гапираётган аёлни тинглай туриб дугонамнинг гапини эслайман: "Боласига раҳм қилмаган эркак бегонага қандай шафқат қилсин!? Ўз боласига бахт ва қувонч беролмаган эркак, бегонани қандай бахтли қилади, унга қандай қилиб қувонч бера олади?!"

Ҳаёт тақозоси билан турмуши бузилган бир аёл билан қадрдон бўлиб қолганмиз. Ҳайит арафаси опадан ҳол-аҳвол сўрагандим, "оҳ"идан осмонга ўт тушди.

- Кечаси қизимнинг мазаси бўлмади,- дейди опа. - Ўксиб-ўксиб кўз ёш тўкаётган қизимга нима деб таскин беришни билмадим, сингилжон. Қизимга "Аллоҳ сени яхши кўради. Аллоҳнинг муҳаббатига эришганинг учун одамлар сени севади. Яхши ўқийсан, илм олишга қизиқасан, бу сенинг бахтинг улкан эканлигидан далолат-ку" десам, "Ҳамма яхши кўрса ҳам, отам бизни яхши кўрмас эканлар. Отам биздан шунчалик осон кечганми, онажон?" дея йиғлайди қизгинам. Мурғак қалби билан "Инсоннинг энг яқин кишиси ота бўлса, ота ўз фарзандидан қандай кечади?" деган саволни қайта-қайта бераверади... Қандай жавоб беришни, нима деб овутишни билмайман. Ўзи шу қизим бошқа болаларимга қараганда кўпроқ отасини яхши кўрарди. Рамазон кунлари ҳам отасининг уйга қайтишини сўраб Аллоҳга илтижо қилиб, дуолар қилди...

... Сўраб-суриштирсам, у аёлнинг эри оилабузар бир чаламулланинг "беминнат ёрдами" билан икки марта эрга тегиб ажрашган, икки боласини эрига ташлаб кетган аёлга уйланган экан. Ўз фарзандининг қадрини билмаган одам бошқанинг боласига ичи куярмиди? Буёқда эркакнинг болалари отасини соғиниб йўл қараяпти. Аёл эса эркакни ўзидан бир қадам нари қилмайди.

Ота, наҳотки, ўз фарзандларини соғинмаса, оталик масъулиятини ҳис этмаса? Хотинига аччиқ қилиб, болаларини ота меҳрига зор қилиш нафақат муқаддас ислом динига, балки инсонийликка ҳам тўғри келмаслигини ўйлаб кўрмаса? Исломда қўш хотинликка рухсат берилган, деган рўкач билан оиласини, фарзандларини пароканда қилаётган бу каби кимсалар оғир гуноҳга ботаётганлигидан, охиратда чексиз азобларга гирифтор бўлишларидан қўрқмасмиканлар?..

Дугонам ҳақида гапиргандим. Яқинда уни жуда ғазабли ҳолатда учратдим. Бунчалик қизғинлигининг боисини сўрагандим, жаҳл билан қўл силкиди:

- Эр, эр дейсан, ахир икки фарзанди туриб хотини билан ажрашибди. Сабабини сўрасам, "Онам билан келишолмади" деди. Наҳотки, икки фарзандни етим қолишига ота ва буви рози бўлса? Эртага мен ҳам унга ёки онасига ёқмасам, мени ҳам ҳайдаб юбормайди, деб ҳеч ким кафолат бермайди-ку?

Тушундимки, дугонам яна биров билан кўришган.

... Отасининг келишини кутиб, сўраб, пичирлаб дуо қилаётган жажжи қизалоқнинг мунгли нигоҳини кўз олдимдан кетказолмаяпман. Яқиндагина Мусулмон оламининг энг улуғ айёми - рамазон ҳайитини нишонладик. Ҳайитда кўнгиллар қувонади, қалблар шодланади. Аммо отасини умид билан кутаётган, ибодатларида дийдор завқини сўраб ёлворган ўша қизчанинг кўнгли ҳам қувондимикан, деган савол мени қийнайверади. Нафсини масъулиятдан устун қўйганлар, хотини кўнглига ўтирмай, болаларини тирик етимликка ташлаб кетаётган инсонлар отаси меҳрига зор бўлиб, қалб-қалбидан ўксинаётган фарзандларининг изтиробини ҳеч йўқ ана шу улуғ кунда англадилармикан?

Тирноққа зор бўлганлар қанча? Яратганнинг ўзи ўша инсонларга инсоф берсин. Бола қалбини йиғлатиш, уни энг азиз инсонлари - ота ва она меҳрига зор этиш оғир гуноҳ эканлигини ҳеч бир ота-она унутмасин. Бу дунёни қайтар дунё дейдилар, токи, йиллар ўтиб, ўша ота-она фарзанд меҳрига зор бўлиб, хорликда яшамасин.

Умида АДИЗОВА.

инмаса, оталик масъулиятини


« орқага


 МАЪЛУМОТЛАР
Нашр ҳақида
Мулоқот
Обуна
Архив
Фонд лойиҳаси

 РЕКЛАМА


 ОБ-ҲАВО


 ВАЛЮТА КУРСИ
Подробнее на www.nbu.com -->

 РЕЙТИНГ

Hosting by UZINFOCOM




Copyright © 2006 — 2024 IQBOL
Сайт Ўзбекистон мустақил босма ОАВни ва
ахборот агентликларини қўллаб-қувватлаш
ва ривожлантириш жамоат фонди кўмагида яратилди.
Дизайн ва дастурлаш SAIPRO компанияси томонидан амалга оширилди