"МАТЕМАТИКА - ФАНЛАР ПОДШОСИ"

Андижон шаҳридаги 24-умумтаълим мактабида фан ҳафталикларини ўтказишга алоҳида аҳамият берилади. Жорий йилнинг февраль ойи математика-информатика фанига бағғишланди.

Тажрибали ўқитувчи Дилфузахон Тоҳирова бошчилигида ташкил этилган фан ойлиги тадбирларида ўқитувчилар Сайёрахон Бадалбоева, Маъмурахон Мамарасулова, Нигорахон Асқарова, Наимахон Матисаева ва Даврон Азизовлар фаоллик кўрсатдилар.

Фан ойлиги давомида очиқ дарс машғғулотлари ташкил этилиб, ноанъанавий дарс усуллари йўлга қўйилди. 6-синф ўқувчилари учун математика дарсида ўйин-мусобақа ташкил этилиб, тестлар ечилди. Кўргазмаларга бой дарс машғғулотида ўқувчиларнинг билимлари балл ҳисобида баҳоланди.

Мактаб миқёсида ўтказилган тадбирда математик олим, файласуф Ал-Хоразмий ҳаёти ва ижоди, унинг фанга киритган янгиликлари, квадрат тенгламалар ҳақида ўқувчиларга чуқур маълумотлар берилди.

Юқори синф ўқувчилари томонидан тайёрланган деворий газеталар, рефератлар, кросс-вордлар, саҳна кўринишлари кўпчиликнинг эътирофига сазовор бўлди.

Фан ойлиги доирасида ўтказилган барча тадбирлар қизиқарли, баҳс-мунозараларга ва таассуротларга бой бўлди.

Р.ҲАЙИТБОЕВА.