ИҚТИДОРЛИ ЁШЛАРИМИЗ

ХАЛҚАРО МУСОБАҚА ҒОЛИБАСИ

Марҳамат ижтимоий-иқтисодиёт ва педагогика коллежининг жисмоний тарбия ва болалар спорти йўналиши 1-курс талабаси Хайрихон Темирова спортнинг қўл жангги тури билан шуғулланаётганига уч йилдан ошди.Туманда очилган "У-ШУ" спорт клубига устози Қобилжон Мўйдинов раҳбарлик қилади.

- Спортда бирор бир ютуққа эришиш учун машғулотларнинг аҳамияти катта, - деган эди устози. - Энг муҳими, ғалабага бўлган иштиёқни шакллантириш.

Ўшанда бу ёш спортчи қиз келажакда эришадиган улкан ғалабалар мана шу мўъжазгина спорт залидан бошланишини ҳаёлига келтирмаганди. Бир йилдан кейин унинг учун ҳақиқий синов даври бошланди. Туманда ва вилоят мусобақаларида қатнашиб, бир неча бор ғолиб бўлди. Талаба қиз шу йил февраль ойида Тошкентда бўлиб ўтган Ўзбекистон чемпионатида қўл жанги спортининг сань-шоу йўналиши бўйича иштирок этиб, иккинчи ўринни олди ва кумуш медаль соҳиби бўлди. Энг асосийси, Халқаро мусобақада қатнашиш ҳуқуқини қўлга киритди.

Хайрихон Темирова спортдаги эришган ютуқлари ҳақида сўз юритаркан, шундай дейди: - Бу йил мен учун омадли келди. Республика очиқ чемпионатини ғалаба билан бошлаган эдим. Апрелда Самар-қандда бўлиб ўтган Халқаро мусобақада барча рақибларимни енгиб, 1-ўринни эгаллашга муваффақ бўлдим. Бу менга янада куч берди.

Ўзида ва сўзида қатъият балқиб турган Хайрихон эндигина ўн олти ёшга тўлди. Спорт билан ошнолиги уни юрт кезишга, ўз шаҳри, таҳсил олаётган коллежи шуҳратини юксакларга кўтаришга имкон берди.

Спорт - маънавий, жисмоний саломатлик манбаи. Саломатлик орқали эса инсон улкан ютуқларга эришиш мумкин. Залда спортчи қизлар машқ қилишади. Рақибини осон усуллар билан енгиб, яна ҳеч нарса бўлмагандай машқни давом эттираётган Хайрихондан: "Нима учун спортнинг бу тури билан шуғулланасиз, қизлар учун спортнинг нафисроқ турлари ҳам бор-ку?" - деб сўрайман.

- Сань-шоунинг инсонни соғлом ва гўзал бўлишига кўмаклашувчи машқ ҳаракатлари гўёки санъат, худди рақсга ўхшайди. Шу боис ҳам спортнинг айнан мана шу турини танлаганман.

Хайрихоннинг нафақат спортга, балки адабиётга ҳам ихлоси баланд. Ёшлигидан шеър ёзишга қизиқади. "Она", "Ватан", "Баҳор", "Ўзбек қизлари" каби бир қатор шеърлари туман газетасида чоп этилган.

20-умумтаълим мактабида ўқиётганда иқтидорли ўқувчилар беллашувида "Ижодкор ўқувчи" номинацияси бўйича танлов ғолиби бўлган. Айни пайтда эса коллежнинг тикувчилик тўгараги аъзоси. Устоз-шогирд йўналишида элита пардалар тикиш, миллий либослар, бисер қадаш сир-асрорларини астойдил ўрганиб келяпти. Келгусида кредит олиб, тадбиркорлик йўналиши бўйича иш ташкил қилиш ниятида.

Ёш, ташаббускор, интилувчан қиз Ҳайрихон Темирова Ўзбекистон Либерал демократик партиясининг "Ишбилармон ўқувчи" туман танловида иккинчи ўринни олиб, вилоятга йўлланма олганлиги ҳам унинг фаол, иқтидор эгаси эканлигидан далолат.

Ҳа, Хайрихоннинг ҳаётдаги, айниқса, спорт ва ижоддаги зафарли одимлари ҳали давом этади. У ўзи орзу қилган чўққиларни забт этади. Бунга биз ҳам ишонамиз ва унга омадлар тилаб қоламиз.

Зулхумор АКБАРОВА.