ШИФОКОР МАСЛАҲАТИ

ҚИЗАМИҚ КАСАЛЛИГИ АСОРАТЛАРИ

Бугунги кунда ҳаётимизга тобора хавф солиб келаётган касалликлардан бири қизамиқдир. Қизамиқ касаллигини вируслар қўзғотади. Касаллик манбаи-беморлар бўлиб, яширин даврининг охирги кунлари тошма тошади. Бу касаллик 3-5 кун мобайнида юқумли ҳисобланади. Инфекция юқиши ҳаво йўли орқали содир бўлади.

Қизамиқ вируслари ҳаво оқими билан коридор, зиналардан яқин атрофдаги хона, хонадон ва квартираларга кириб боради. Касалликни организмга кириш дарвозаси юқори нафас йўлларидир. Касалликнинг яширин даври 9-10 кун, баъзида эса, 20 кунгача давом этади.

Қизамиқ касаллиги аста-секин бошланади. Тана ҳарорати 39 даражага кўтарилади. Бош оғриши, тумов, қуруқ йўтал, кўздан ёш оқиши кузатилади. Касаллик бошланишининг 3-4- кунлари тошмалар юз, қулоқ орқаси терисида кўринади. Тошмалар 3-4 кун ичида бутун терининг ҳамма қисмини эгаллайди.

Тошмалар қандай бошланса, бешинчи кундан бошлаб шу тартибда пасаяди. Тошма ўрнида оч жигарранг доғлар қолади. Қизамиқ 2 ёшгача бўлган болаларда оғирроқ ўтади. Касалликдан сўнг баъзида асоратлар қолади (бронхит, зотилжам, ларингит). Касалликни даволашда бемор ётган хона яхшилаб шамоллатилади. Бемор алоҳида парвариш қилинади. Хоналар озодалигига эътибор берилади. Витамин А, В, С ларга бой таомлар бериш тавсия этилади. Кўпроқ суюқлик ичирилади. Касалликнинг олдини олишда болалар эмланади. Бемор 5 кун мобайнида алоҳида хонада ётиши, хона эса шамоллатилган ва гигиеник тозаланган бўлиши шарт. Касаллик чиққан жойларда карантин ташкил қилинади.

Касаллик белгилари аниқланган заҳоти шифокорга мурожаат қилиш зарур!

Лолахон ҲАКИМОВА,

Вилоят ўсмирлар диспансери бош шифокори.

Назирахон АЛИМОВА,

ҳамшира.