ГИЁҲВАНДЛИК - ИЛЛАТ

ЖАҲОННИ ҚАМРАЁТГАН ТАШВИШ

Инсонни яхши йўлга етаклайдиган ҳам, ёмон йўлга бошлайдиган ҳам инсон. Доно халқимиз айтганидек, "Яхшига эргашсанг – етарсан". Масалан, бир инсон ҳалол йўл билан меҳнат қилади. Лекин, ўша инсонни чалғитадиган, йўлдан урадиганлар кўп учрайди. Ўғирликка шерик қилади. Кечалари болаларни кайфу-сафоларга, тилга олиб бўлмайдиган, инсон хаёлига келмайдиган ишларни қилишга бошлайди. Сўнгра гиёҳвандликка етаклайди.

Гиёҳвандлик нега инсонларни ўз домига тортиб бормоқда? Унга қарши қандай курашиш лозим?

Гиёҳвандлик ҳозирги кунда аҳолининг айрим иродаси бўш, айниқса, ишсиз, касб-ҳунарсиз қатлами орасида кўп учрамоқда. Нега, гиёҳвандлик иллатидан воз кечишга ўзимизда куч-қувват топа олмаймиз? Одамнинг қўлидан ҳар қандай иш келар экан, демак, мақсадимиз яхшилик ва эзгуликка қаратилмоғи жоиз. Айни кунларда аср вабосига айланган гиёҳвандликка қарши курашиш жамиятимизнинг ҳар бир фуқароси олдида турган муҳим ва долзарб вазифадир. Шу мавзуда мақола ёзаётган пайтда хаёлимга бир фикр келиб қолди. Мен буни шеърий мисралар тарзида ёзишга жазм қилдим:

Иллатдан йироқ юр, етар бардошинг,

Эзгулик юртида омон дир бошинг.

Асрнинг вабоси дилда қора доғ,

Бу доғдан юраклар бўлмоқда адоғ...

Шундай экан, гиёҳвандликка қарши бошланган ҳар бир иш хайрлидир. Дунёда элга, Ватанга нафи тегадиган, имон-инсофли, садоқатли, бунёдкор ёшлар кўпаяверсин. Одамларга яхшилик соғинган кишилар сафи кенгаяверсин. Зеро, дунё яхши инсонларнинг елкасидадир.

Азаматжон УСМОНАЛИЕВ,

АДУ қошидаги 5-академик лицей талабаси.