ШИФОКОР МАСЛАҲАТИ

Табиатда ҳар бир нарса ўз ўлчови билан яратилганидек, инсон организми ва ундаги ўзгариш жараёнлари ҳам бир-бирига узвий боғлиқдир.

МАСТОПАТИЯ НИМА?

Айтайлик, аёлнинг ой-куни етиб кўзи ёриди. Чақалоғини бағрига босганида кўкраги сутга тўла эканлигини ҳис қилди. Бу эндигина дунёга келган мурғакнинг ризқи. Энди у ташқи муҳитда. У шу муҳитдан нафас олади, озиқланади, ривожланади.

Мастопатия хасталиги кўпинча туғиш ёшидаги аёлларда учрайди. Кам туғиш, кўкрак сутининг кам келиши, кўп марталаб бола олдириш, аёллар жинсий аъзолари, қалқонсимон безлари ва жигарнинг касалланиши ҳам бу хасталикнинг пайдо бўлишига сабаб бўлади.

Сут безлари тўқимасининг тузилиши ва фаолияти аёл кишининг ёшига, бўйида бўлишига, болани эмизишига қараб ўзгаради. Бу ўзгаришлар ички секреция безлари, аввало, тухумдонлар ишлаб чиқарадиган гармонларнинг бевосита таъсирида рўй беради. Аёл кўзи ёриганидан кейин 10-12 ойгача кўкрагига сут келиб туради. Ана шу муддат охирига келиб, сут безларида оғриқли қаттиқ тугунлар пайдо бўлади. Ана шу ҳолат мастопатиянинг асосий белгилари ҳисобланади. Қаттиқ тугунлар вақт ўтиши билан катталашиб кетиши мумкин. Ҳар сафар бола олдиргандан кейин бу жараён оғирлашади.

Сут безларининг шиши, оғриши, кўкрак учидан рангсиз, қўнғир, кулранг, кўкимтир ажралмалар чиқиши касаллик аломатидир.

Мастопатияси бор беморлар онкологик диспансер назоратида бўлиб, бир ойда бир марта сут безларини текширтириб туришлари шарт.

Хуллас, ҳар бир аёл ўзига эътибор билан қараб, гигиеник талабларга риоя қилишлари зарур. Шуни билиш керакки, сут безларининг катталашиши, қонли ажралмалар чиқиши, шиш устидаги тери рангининг лимон пўчоғига ўхшаб ўзгариши, кўкрак учининг ичига тортилиши сут безлари хафвли ўсмасининг аломати бўлиши мумкин. Шундай ҳолатларни сезгудек бўл-сангиз, зудлик билан онколог қабулига боринг. Хасталик қанча барвақт аниқланса, шунчалик тез тузалади.

Муқаддас ХОМИДОВА,

шифокор,

Асака тиббиёт коллежи терапия фани ўқитувчиси.