ЁШ ШАХМАТЧИЛАР БЕЛЛАШУВИ

Мамлакатимиз мустақиллигининг 20 йиллик байрамига бағишланиб, республика Халқ таълими вазирлиги соврини учун Андижон шаҳрида ўқувчи ёшлар ўртасида шахмат турнири бўлиб ўтди. Ушбу турнирда республикамизнинг энг кучли ёш шахматчилари ўзаро куч синашдилар.

Қорақалпоғистон Республикаси, Тошкент шаҳри ва республикамизнинг барча вилоятларидан 4 нафардан вакиллар, жами 56 нафар ўғил-қизлар иштирок этган мусобақа ўйинлари тезкор усулда ўтказилди.

Якуний натижаларга кўра, умумжамоа ҳисобида Самарқанд вилояти жамоаси биринчи, Навоий вилояти ҳамда Тошкент шаҳри жамоалари иккинчи ва учинчи ўринларни банд этдилар.

Жамоа ва якка тартибдаги иштироки бўйича ғолиблар диплом ва қимматбаҳо совғалар билан тақдирландилар.

Ўтказилган ушбу турнир ёш спортчилар қалбида ўзларига ишонч, эртанги кунга умид, она Ватанга муҳаббат, истиқлол ғояларига ҳурмат туйғуларини янада мустаҳкамлашга хизмат қилди.