ПАХТА - РИЗҚ-РЎЗИМИЗ

Аллоҳ таоло барча маҳлуқотлар ичида инсонни азизу мукаррам қилди. Инсон учун ўн саккиз минг оламни фармонбардор этди. Яратган Қуръони Каримда: "Эй иймон келтирганлар, сизлар Парвардигорингизнинг берган неъматларини санаб саноғига ета олмайсизлар", дея марҳамат қилади.

Дарҳақиқат, бу неъматларга ҳар қанча шукроналар қилсак арзийди. Ана шундай неъматлардан бири - пахтадир. Одам фарзанди чақалоқ бўлиб дунёга келганида у пахтадан бўлган юмшоқ матолардан тикилган турли-туман кийимларни кийиб ҳаёт кечиради. Пахтадан тайёрланган маҳсулотлар ва уларнинг инсонларга келтирадиган фойдалари ҳақида оқил одам жуда яхши билади.

Мана, айни кунда юртимизда пахта терим мавсуми уюшқоқлик билан олиб борилмоқда. Етиштирилган пахта ҳосилини нест-нобуд қилмасдан, ёмғир сочинга қолдирмасдан йиғиб-териб олиш юртимизда яшаётган ҳар бир фуқаронинг муқаддас бурчидир.

Пахта терими хашарларида фаол қатнашишлик ва бу қилган ишимиз ўзимиз учун, турмушимиз фаровонлиги учун нечоғли муҳим эканлигини ҳар биримиз чин дилдан ҳис этайлик. Шу ўринда, моддий ва маънавий бойлигимиз бўлган пахта ҳосилини йиғиб олишда катта-ю-кичик юртдошларимизнинг дунёда бахтли, охиратда саодатлик бўлишларини алоҳида айтиб ўтамиз. Яна шуни таъкидлаш жозки, нафсларининг кўйига кириб, ғараз ният билан пахтани ўғирлаб, четга сотишга уринаётган кимсаларнинг борлиги ачинарлидир. Юқорида таъкидлаб ўтганимиздек, пахта бизга Аллоҳ таоло томонидан берилган неъматдир. Унинг бир толасига қилинган хиёнат бутун Ўзбекистон халқининг ҳаққига қилинган хиёнат бўлади. Тангри таоло бандаси билан Ўзининг ўртасидаги гуноҳларини кечириб юборади, лекин банда билан бандаси ўртасидаги олди-бердиларни фақат бир-бирларини рози қилгандагина кечади.

Бас, шундай бўладиган бўлса ҳар бир инсон қадамини ўйлаб босмоғи, юртимизга, халқимизга - унинг моддий ва маънавий ҳақларига хиёнат қилмаслиги лозим. Пахтани яширин йўллар билан четга сотишга уринаётган фуқароларимиз бу қилмишларининг нақадар ёмон иллат эканлигини тушуниб етсинлар, акс ҳолда Парвардигорнинг лаънатига ва ҳукуматимиз қонунларида белгиланган жазоларга маҳкум бўлишлиги аниқ.

Фурсатдан фойдаланиб, теримчиларимизга, хашарчиларимизга Яратгандан куч ва мадад, ғайрат ҳамда шижоат сўраймиз. Парвардигор барчамизни тўғри йўлдан адаштирмасин, юртимиз тинч, осмонимиз мусаффо бўлсин. Деҳқонларимизнинг заҳматли меҳнатлари эвазига етиштирилган пахта ҳосилини йиғиб олишда барчамизга Аллоҳ ўзи мадад берсин.

Ҳожиакбар ҳожи ЯХЁЕВ,

Андижон шаҳридаги "Зубайр ибн Аввом"

жомеъ масжиди

имом-хатиби.