БИРИНЧИ ҚОР

Ҳар гал қор ёққанида дилда ҳаяжон,

Оппоқ орзуларга бўламан ҳамроҳ.

Кумуш парчаларким, бесаноқ, бесон,

Нозик ҳиссиётдан этади огоҳ.

Қорбўрон ўйнардик биринчи курсда,

Қий-чувга чўмарди кенг майдон бирдан.

Юзларим ловуллаб бир алвон тусда,

"Сиз ёмон экансиз", - дердинг дафъатан.

Қиз бола қисмати ҳаммага аён:

Бир кун учар-кетар ўзга манзилга.

Сен ҳам учиб кетдинг, манзил ноаён,

Соғинчлар тиғ санчар нозик кўнгилга.

Ёғар зарра-зарра бу биринчи қор,

Шу қорга ёзгайман исмингни ҳар гал.

Ҳамон туйғуларим қордай беғубор,

Ҳамон кўз олдимда турибсан, гўзал!

Икромжон АСЛИЙ.