"АСЛ ЛИБОСЛАР" ФЕСТИВАЛИ

Вилоят хотин-қизлар қўмитаси ҳамда ўрта махсус касб-ҳунар бошқармаси ҳамкорлигида "Асл либослар" фестивали бўлиб ўтди.

Фестивалда олий ўқув юртлари талабалари ҳамда касб-ҳунар коллежлари ўқувчилари ўзларининг ранг-баранг либослари билан иштирок этдилар.

Тадбирни вилоят ҳокими ўринбосари, вилоят хотин-қизлар қўмитаси раиси Н.Яқубова очиб, барча иштирокчиларни муборакбод этди.

Фестивалда Андижон давлат тиббиёт, қишлоқ хўжалик институтлари , Андижон миллий ҳунармандчилик ва иқтисодиёт ҳамда Андижон енгил саноат касб-ҳунар коллежлари жамоалари "Ёшларнинг замонавий либослари", "Миллий матолардан тикилган либослар", шунингдек, "Мавсумий либослар" номинациялари бўйича хушбичим ва чиройли либосларини намойиш этдилар.

Қизлар ўртасида кийиниш маданиятини шакллантириш, миллий либосларимизга ҳурмат-эътибор ошириш мақсадида ташкил этилган мазкур фестиваль истеъдодли ёшларни қўллаб-қувватлаш, касбий маҳоратларини кучайтиришда муҳим аҳамият касб этди.

Ёш чевар қизларнинг кўргазмали чиқишлари мутахассислар томонидан баҳолаб борилди.

Бир сўз билан айтганда, бу каби тадбирлар талаба-ёшларнинг малака ва касб маҳоратини оширишга хизмат қилмоқда.

Тадбир сўнггида ғолиб жамоалар, фаол иштирокчилар фахрий ёрлиқ ва эсдалик мукофотлари билан тақдирландилар.

Баҳодиржон УММАТОВ.