НОН ТАНОВУЛ ҚИЛИШ ТАРТИБИ

Инсон саломатлиги учун энг керакли озуқа бу нондир. Нонни истеъмол қилиш урф бўлган халқлар учун бу неъматнинг ўрнини босадиган ҳеч бир нарса йўқ. Нонни деярли ҳамма овқатлар билан тановул қилиш мумкин. Халқимизда "Ошдан кейин нон ейиш - суннат", деб бежиз айтилмаган.

Дарҳақиқат, паловдан сўнг нон ейилади. Сабаби, нон ош ҳазмини яхшилашга хизмат қилади. Бироқ, бу неъматнинг ўзини қандай истеъмол қилиш масаласи муҳимдир. Яъни, янги ёпилган нонни иссиқлигида тановул қилиш организм учун зарарли ҳисобланади. Аксинча, суви қочган ёки махсус қотирилган нонни истеъмол қилиш фойдалидир.

Ноннинг турларига тўхталадиган бўлсак, у деярли барча турдаги донлардан тайёрланиши мумкин. Масалан, буғдой, арпа, маккажўхори унидан тайёрланган нонлар жуда фойдали. Шу ўринда алоҳида таъкидлаш жоизки, тузи ўткир бўлиб тайёрланган нонни ейиш ўта зарарлидир. Бир кило хамирга 4 гр. туз солинса, мақсадга мувофиқ бўлади. Тандирда ёпиладиган нонларнинг барчаси кепакли бўлсин. Шунда нонлар инсон саломатлиги учун фойдали бўлади.

Озодахон ОЛИМОВА тайёрлади.