ИСКАНДАР - ХАЛҚАРО ФЕСТИВАЛЬ ҒОЛИБИ

Росиянинг Санкт-Петербург шаҳрида МДҲ мамлакатлари ёшлари иштирокида ўтказилган "Окно в Европу" VII халқаро фестивалининг халқ чолғулари номинацияси бўйича Андижон туманидаги Т. Содиқов номли 7-сон махсус мусиқа мактаб-интернати 8-синф ўқувчиси Искандар Собиржонов 1-ўринни эгаллади ва келгуси йилда Германия ва Францияда бўлиб ўтадиган халқаро мусиқа фестивалида иштирок этиш учун йўлланма олди.

"Лаукарас" деб номланган лойиҳа доирасида икки тур асосида ўтказилган мазкур танловда И. Собиржоновнинг ғижжак ёрдамида ижро этган миллий, жаҳон классикаси ҳамда қардош халқлар куйлари, ёш мусиқачимизнинг ижро маҳорати ҳакамлар томонидан юқори баҳоланди.

- Мақсадим - Германия ва Францияда ўтадиган танловда ҳам ғолиблар қаторидан ўрин олиш, - дейди Искандар Собиржонов. - Ҳозирда устозларим кўмагида танловга жиддий тайёрланяпман. Ғолиб бўлиш, қолаверса, юртимиз довруғини янада ошириш учун бор маҳоратимни ишга соламан.

Ёшларимизнинг нафақат республика, балки халқаро танловларда юқори натижаларга эришаётганлиги мамлакатимизда муҳтарам юртбошимиз раҳнамолигида мусиқа мактабларига кўрсатилаётган эътибор ва ғамхўрлик, ёш истеъдодларни юзага чиқариш, уларнинг ўз иқтидор ва салоҳиятларини тўлақонли намоён этишлари учун яратиб берилаётган кенг имкониятлар самарасидир.

Ф. ИБАЙДУЛЛАЕВ.