ЁШ СПОРТ ЮЛДУЗЛАРИ

ОРЗУЛАРИ ОСМОН ҚИЗ

Элмира Жалақудуқнинг Қўртқи қишлоғида туғилиб ўсган. Ёшлигидан адирларда мол-қўй боқиб юрган қиз тоза ҳаволардан нафас олиб, соғлом ва чапдаст бўлиб ўсди. Раҳматли бувиси Саодатхон ая ҳамиша унинг пешонасини силаб, "Сенинг пешонанг очиқ, албатта бахтли бўласан, орзуларинг ҳам ушалади", дерди.

Қишлоқдаги 35-умумтаълим мактабининг 1-синфига қатнай бошлаганида биринчи устози - Гулчеҳра Мўлдрисова унга ўқиш, ёзишни, шу билан бирга Ватанни, юртни севишни ўргатди. Айниқса, унинг болалик қалбида спортга меҳр, муҳаббат уйғотганлиги Элмиранинг орзулари сари илк қадамини ташлашига туртки бўлди.

2010 йилда қишлоқда каратэ ва бокс бўйича спорт клублари ташкил этилди. Элмира биринчилардан каратэ клубига аъзо бўлди. Тўгарак машғулотларида қатнашиб, ўз маҳоратини ошириб борди.

Қишлоқда Тешиктош иқтисодиёт коллежи барпо этилгач, Элмира сингари кўплаб ёш спортчилар учун кенг имкониятлар эшиги очилди. Коллежда "Навқирон" каратэ-до клуби ташкил қилинди ва мураббий Абдували Нурматов ҳаваскор спортчилар билан мунтазам машғулотлар ўтказа бошлади. Ҳар бир машғулот давомида мазкур жанг санъати турининг сирларини мукаммал ўрганиб, чиниқиб борган Элмира Андижон, Фарғона, Тошкентда бўлиб ўтган турли спорт мусобақаларида қатнашиб, юқори натижаларга эришди. Ўтган йили эса 15 ёшли қизлар ўртасида ўтказилган Ўзбекистон чемпионатида 1-ўринга сазовор бўлиб, олтин медаль соҳибасига айланди.

- Ота-онам, устозимнинг ишончларини оқлаганим учун кўзларимга ёш келди, - дейди Элмира ўша дамларни хотирлаб. - Ўтган йил мен учун омадли йил бўлди. Спортда ютуқларга эришдим. Андижон педагогика коллежининг жисмоний тарбия йўналишига ўқишга кирдим, вилоятимиз марказида ўтказилган Мустақиллигимизнинг 20 йиллик тантаналарида юртимиз байроғини кўтариб, иштирок этдим.

Элмира оддий, меҳнаткаш оилада ўсиб, улғайди. Отаси Отабек Исақов фермер хўжалигида, онаси Мақсадхон кутубхонада меҳнат қилишади. Чекка бир қишлоқда камол топган Элмиранинг спортда эришаётган ютуқлари барчамизни қувонтирди. - Мақсадим - спортдаги ютуқларим билан Андижонимиз, Ўзбекистонимиз шуҳратини юксакларга кўтариш, - дейди Элмира.

Хотин-қизлар байрами арафасида орзулари осмондай тиниқ Элмира Исақовага ва у каби кўплаб спортчи қизларимизга омад ва бахт тилаймиз.

Раҳима АБДУРАҲМОНОВА.