Пазанда маслаҳати

РУЛЕТЛИ СОМСА

Керакли масаллиқлар: Бир боғдан кашнич, исмалоқ, жағ-жағ, кўкпиёз, укроп, 3 ош қошиқ ўсимлик ёғи, бир донадан пиёз ва тухум, юмшоқ хамирга яраша ун, зираворлар, туз.

Тайёрланиши: Кўкат ва пиёзни майда тўғраб, тузини ростлайсиз. Хамирдан каттароқ зувалачалар ясаб, уни диаметри 20 см. бўлган айлана ҳосил қилиб ёясиз. Хамир жилдига бир чой қошиқдан ўсимлик ёғидан суртиб чиқасиз ва 3 ош қошиқдан кўкатли қиймадан соласиз. Уни рулет шаклида ўраб чиқасиз ва устига чақилган тухумдан суртасиз. Духовка патнисига ёғ суртиб, сомсани бир текисда жойлаштирасиз. Кейин духовкага қўйиб, 20 дақиқа давомида паст оловда пиширасиз.

Тайёр бўлган рулетли сомсани бироз совутиб, ромби шаклида кесасиз. Ликопга солиб, устига 3-4 япроқ кашничдан ташлаб қўясиз.