(ҚАТРА)

ОҚИБАТ КЕЛТИРГАН ТАШРИФ

Хуршида билан Назира гуруҳдош. Шундай бўлса-да, мана икки ойдирки, бир-бири билан на саломлашади, на гаплашади. Аразлашиб қолишган. Ногаҳон тўқнашиб қолишганда ҳам юзларини терс буриб, худди бир-бирларини кўрмагандай ўтиб кетишади. Бунга сабаб - дарс юзасидан қаттиқ жанжаллашиб қолгани.

Дугоналари уларни яраштиришга қанчалик ҳаракат қилмасинлар, бефойда. Улар ўзларича ҳақ. "Биринчи бўлиб у кечирим сўрасин, чунки айб унда", дейишдан нарига ўтишмайди.

Сешанба куни инглиз тили дарси сўнгида Суҳроб муаллим барчани тўплаб:

- Талабалар, сизларга бир таклифим бор. Бирор кун ҳаммамиз сўлим бир жойда палов дамлаб, гурунглашиб ўтирсак, қандоқ бўларкин, - деди.

Талабалар устознинг фикрини маъқуллашди. Фақатгина Хуршида ва Назира норози оҳангда бир-бирларига қараб қўйиш билан чекланишди.

Белгиланган кун ҳам етиб келди. Ҳамма айтилган жойга келган, лекин икки талабанинг ўрни ҳамон бўш турибди.

"Қандай қилиб бораман? У билан бир дастурхон атрофида ўтира олмайман-ку?" безовталанди гиначиларнинг бири. Иккинчиси ҳам: "Орамиздаги гиналарни устоз сезиб қолса, уларга қайси юз билан қарайман?", дея ўйланди.

Ниҳоят, иккаласи даврага бир пайтда ташриф буюришди. Боядан бери тунд кайфиятда ўтирган Суҳроб муаллимнинг юзига табассум ёйилди.

Талабалар бир-бирларига самимий тилаклар билдирарканлар, кечанинг аъло даражада ўтаётганлиги, айниқса, устознинг насиҳатларидан сўнг Хуршида ва Назиранинг ўрталаридаги келишмовчиликлар унутилганлиги, уларнинг шундоққина ёнма-ён ўтириб, нималарнидир маслаҳатлашаётганликларидан яққол сезилиб турарди.

Дурдона МУХТОРОВА,

ЎзЖТУнинг халқаро журналистика факультети талабаси.