БУГУННИНГ ЁШЛАРИ

ШЕЪРИЯТГА ОШУФТА КЎНГИЛ

Юртимизда ёшлар учун кўплаб имкониятлар яратилмоқда. Уларни ўз билим-кўникмаларини синаб кўришлари учун турли хил кўрик-танловлар ташкил этилган. Айниқса, Зулфия номидаги Давлат мукофотининг таъсис этилганлиги юртимиздаги истеъдодли қизларнинг ўз иқтидорларини тўла намоён эта олишлари учун бир имкониятдир. Бу мукофот ҳар бир ижодкор қизнинг орзусига айланган.

Ана шундай иқтидорли қизлардан бири Мафтуна Қўчқаровадир. У Пахтаобод туманида туғилган. Ҳозирда Пахтаобод маиший хизмат касб-ҳунар коллежида таҳсил олмоқда. Ўқувчилик давриданоқ адабиётга, шеъриятга ихлоси баланд бўлган бу қиз бўш пайтларида шеърлар машқ қила бошлади.

У тумандаги "Ҳабибий" музейи қошида ташкил этилган "Ёш ижодкорлар" адабий тўгарагининг фаол аъзоси. Устози, шоир Акрамжон Ҳамрақуловдан шеъриятнинг сир-асрорларини ўрганаётганига унча кўп бўлмаса-да, шеърларини туман "Давр садоси" газетасида бир неча бор чоп эттириб улгурди. Ижод намуналари ёш қаламкашларнинг "Илҳом чечаклари" номли тўпламида ҳам нашр этилди.

Шунингдек, қаҳрамонимиз коллеждаги барча тадбирларда фаол қатнашишга ҳаракат қилади. Унинг Она-ватан, беғубор ёшлик, табиат мавзуидаги шеърлари мухлислар эътиборини топмоқда.

Мафтуна келажакда яхши шоира бўлиб етишиш орзусида. У албатта, ўзининг эзгу орзуларига эришиши шубҳасиз. Чунки бизнинг юртда бунинг учун барча имкониятлар етарли.

Нурилло ТЎХТАСИНОВ,

Пахтаобод тумани.