ҚАТРА

ЭРТАДАН БОШЛАЙМАН

Эрталаб эриниб кўзимни очишим билан хаёлимдан ўтган биринчи фикр шундай бўлади: "Уфф, бугун ҳам дарсга кечикдим". Чала-чулпа юзимни ювганча кечагидан қолган бир қултум совуқ чойни нонушта ўрнида ҳўпларканман, апил-тапил кийиниб, ўқишга югураман.

Шошилганда автобус ҳам ҳаяллайди-ей. Афсус билан қўлимдаги йўл чиптасига қараб, бош чайқаганча, такси тутишга мажбур бўламан. Сумкани тескари тутканча аудиторияга кириб келарканман, ўқитувчимнинг кўзойнак остидан кулимсираб турган кўзларигай-ю, танбеҳли сўзларига бошимни эгиб, жойимга ўтиргач, қатъий аҳд қиламан. "Етар, бас!" Ҳаммасини эртадан бошлайман. Кечикиб уйғонишлар, овчидан қочган қуёндай жонсаракланиб югуришлар, автобус ортидан қувишлар жонга тегди. Хаёлим осмонларда учиб юрганини муаллим ҳам сезди шекилли, бирдан ёнимга келиб савол бериб қолса бўладими?

Ростини айтсам, бугун тарих фанининг ўтилиши етти ухлаб тушимга кирмаганди. Ўқитувчимизнинг кўзига термулганча туравердим.

- Вазифани тайёрламабсиз-да. Ҳеч бўлмаса, конспект қилгандирсиз? Олиб келинг, - деди муҳтарам устозим.

Шошиб кеча бир изласин, дея сумкамга солиб қўйган укамнинг математика дафтарини кўтариб борибман. Устоз ўтирган жойида қўлидаги ручкани гир айлантираркан, менга еб қўйгудек тикилиб, "Эсингиз жойидами, ўртоқ Аҳмедова ёки кечаги тушингизни ҳалиям давом эттираяпсизми?", деб юборса бўладими.

Гуруҳда кулгу кўтарилди.

Тоза шарманда бўлдим ўзиям. Диванга ёнбошлаволиб сериал кўргунча дарс тайёрласам бу кунлар бошимга тушмас эди.

Хуллас, трамвай ойнасидан мўлтирлаб ташқарига термулганча уйга қайтар эканман, кунига камида ўн марта миямдан ўтказадиган фикрни яна такрорладим. "Ҳаммаси яхши бўлади. Эртадан бошлайман!!!"

Дурдона МУХТОРОВА,

ЎзДЖТУ талабаси