РИВОЯТ

БОЙЛИК, ОМАД ВА БАХТ

Кунларнинг бирида аёл уйидан чиқаётиб, ҳовлида учта нуроний оқсоқолга кўзи тушди. Уларни у шу кунгача ҳеч кўрмаган эдим.

Аёл уларга салом бериб, деди:

- Мен сизларни танимайман, лекин қорнингиз очгандир? Марҳамат, уйга киринглар, меҳмонимиз бўласизлар.

- Соҳибингиз уйдамилар? - сўрашди нуроний отахонлар.

Аёлнинг эри уйда йўқ эди ва у "йўқ" деб жавоб берди.

- Унда биз киролмаймиз, - дея бош чайқашди нотаниш кишилар.

Кечқурун аёлнинг эри уйга келди. Шунда у эрига бўлган воқеани сўзлаб берди. Эри эса: "Қарияларнинг ёнига боргин ва менинг уйдалигимни айтиб, уларни меҳмонга таклиф қил", дея тайинлади.

Аёл эрининг айтганини қилди. Бироқ нуронийлар ҳаммалари баравар уйга киролмасликларини айтишди.

Аёл ҳайрон:

- Нега? - дея сўради.

Шунда қариялардан бири ёнидаги шерикларини кўрсатаркан, гап бошлади:

- Бунинг исми Бойлик, буники Омад, мен эса Муҳаббатман. Эрингдан бориб сўра-чи, олдин кимни уйга киритаркин? Қайси биримизни хонадонингизда кўпроқ бўлишимизни хоҳлайсизлар?

Аёл уйига қайтиб, бу ҳақда эрига айтди. Эри буни эшитиб, ҳайратдан ёқа ушлаб қолди.

- Жудаям яхши, аввал Бойликни таклиф қила қолайлик, у билан уйимиз давлатга тўлади", - дебди.

Аёл эса:

- Азизим, Омадни таклиф қилайлик, - деди.

Уларнинг суҳбатини эшитиб турган келини гапга қўшилибди:

- Муҳаббатни таклиф қилайлик. Шунда хонадонимиз меҳр-муҳаббатга лиммо-лим бўлади.

- Келинимизнинг айтганини қиламиз. Боргин, Муҳаббатни меҳмонга таклиф қилиб кел, - деди эркак.

Аёл ташқарига чиқиб, нуронийларнинг қайси бири Муҳаббат эканини сўради ва уни уйига таклиф қилди.

- Марҳамат, бизнинг энг азиз меҳмонимиз бўлинг, - дея илтифот кўрсатди.

Улар уй остонасига яқинлашганларида, қолган икки меҳмон ҳам уларнинг ортидан кириб кела бошлашди.

Аёл яна ҳайрон. Бойлик ва Омадга қараб:

- Мен фақат Муҳаббатни таклиф қилганман, сизлар ҳам кирмоқчимисизлар? - деб сўради.

Улар эса:

- Агар сиз фақатгина Бойлик ёки Омадни таклиф қилганингизда биз ортингиздан эргашмаган бўлардик. Лекин сиз Муҳаббатни танладингиз, демак, биз ҳам у билан биргамиз, - дейишиб, ўша хонадондан қўним топишган экан.

Қиссадан ҳисса: Қаердаки меҳр-муҳаббат бор экан, ўша жойда омад ва давлат ҳамиша унга йўлдошдир.

М.ХОЛБЕКОВА тайёрлади.