ЭРТАКЛАР - ЯХШИЛИККА ЕТАКЛАР

Андижон шаҳридаги 18-умумтаълим мактаби қошида ташкил этилган "Камалак" болалар ёзги дам олиш оромгоҳи шу кунларда мактаб ўқувчилари билан гавжум. 75 нафардан ортиқ болалар оромгоҳда мириқиб дам олиш билан бир қаторда соғломлаштирилмоқда. Оромгоҳда ўтказилаётган турли тадбирлар, шоир ва ёзувчилар билан учрашувлар спорт мусобақалари келажагимиз эгаларининг билимлари янада ошишига кўмак бермоқда.

Куни кеча мазкур оромгоҳда Бобур номидаги вилоят ахборот-кутубхона марказида ташкил этилган "Кутубхона - иккинчи оилам" клубининг навбатдаги машғулоти бўлиб ўтди. Машғулот аввалида болажонлар билан "Китоб - энг яқин дўстим", "Эртаклар-яхшиликка етаклар" мавзусида суҳбат ўтказилди. Болажонлар Ватан, она, мустақиллик мавзуларини тараннум этувчи шеърларни ёддан айтиб бердилар. Шундан сўнг ахборот-кутубхона маркази ходимлари О.Мамажонова, О.Ризаева, Д.Каримова. ва О.Юлдашевалар томонидан "Зумрад ва Қиммат" ўзбек халқ эртагидаги ақлли ва меҳнатсевар Зумрад, ишёқмас Қиммат, сеҳргар кампир, Қимматнинг онаси образлари маҳорат билан ижро этилди.

Яхшиликка етакловчи ўзбек халқ эртаклари ўсиб келаётган ёш авлодни баркамол инсон қилиб тарбиялашда ўз самарасини бериши, шубҳасиз.

О.ЮЛДАШЕВА,

Бобур номидаги Андижон АКМ бош кутубхоначиси.