ИЖОДКОРЛАР БАЙРАМИ

Қўрғонтепа туман ҳокимлигида вилоят матбуот ва ахборот бошқармасининг халқимизнинг энг улуғ, энг азиз байрами - Истиқлол байрамига ҳамда "Қўрғонтепа ҳақиқати" газетасининг ижодий тажрибаларини ўрганишга бағишланган сайёр йиғилиши бўлиб ўтди.

Тадбирда вилоятдаги босма ОАВ раҳбарлари, ижодкорлар, меҳнат фахрийлари, туман газетаси муштарийлари ва ижодкор ёшлар иштирок этди.

Байрам тадбирида сўз олган вилоят матбуот ва ахборот бошқармаси бошлиғи А. Султонов, туман ҳокими А. Эргашев, Ўзбекистон Журналистлари ижодий уюшмаси вилоят бўлими раиси Н. Саидовлар юртимизда, хусусан, вилоятимизда босма оммавий ахборот воситаларининг жамиятдаги ўрни ва роли, уларнинг фаолиятини қўллаб-қувватлаш ва юксалтириш учун берилаётган эътибор хусусида гапириб, барчани улуғ байрам билан муборакбод этдилар.

Анжуман қатнашчилари "Қўрғонтепа ҳаёти" газетасининг тарихий йўли, ижодий ютуқлари билан яқиндан танишдилар. Якунда туман газетаси равнақига муносиб ҳисса қўшган бир гуруҳ ижодкорлар, меҳнат фахрийлари туман ҳокимлигининг фахрий ёрлиқ ва қимматбаҳо совғалари билан тақдирландилар.

Шундан сўнг ижодкорлар бир пиёла чой устида суҳбатлашиб, ушбу байрам тадбирини кўтаринки кайфиятда ўтказдилар. Туман маданият ва спорт бўлими тасарруфидаги бадиий жамоалар, санъаткорлар томонидан ижро этилган куй-қўшиқлар даврага ўзгача файз киритди.

Ф. ИБАЙДУЛЛАЕВ.